Partia Aleanca për Shqiptarët ka filluar përgatitjet për zgjedhjet lokale që mbahen në vjeshtë të këtij viti. Partia e Arben Taravarit ka mbledhur sonte Kryesinë në Tetovë ku mbledhja ka zgjatur rreth 6 orë, shkruan Top24
Pjesë e diskutimeve ka qenë organizimi për zgjedhjet lokale që do të zhvillohen në tetor. Fillimisht është diskutuar procesi i zgjedhjes së kandidatëve për komunat ku do të garohet. Nga burime tona brenda ASH-së, mësojmë se ka pasur zëra të ndryshëm që të dilet me lista të veçanta, të përbashkëta në koalicion me VLEN, por edhe me kandidatë të veçantë.
Kujtojmë se kryetari i ASH-së, Arben Taravari ka deklaruar kohë më parë se tashmë kryetari i Gostvarit, Valbon Limani do të jetë kandidat i këtij qyteti duke u bazuar edhe në sondazhet që e kanë nxjerrë vazhdimisht Limanin në epërsi.
Në mbledhjen maraton prej 6 orësh të ASH-së, një pikë tjetër e rëndësishme ka qenë caktimi dhe tashmë zgjedhjet e Forumit të Gruas në shumë komuna, si dhe ndryshimet të drejtuesve të Forumeve Rinore, të cilët nga kjo parti i cilësojnë si motorët kryesorë të fitoreve të tyre.
Së fundmi, pjesë e mbledhjes mësohet se ka qenë edhe nisma për punë dhe kontakte në terren me simpatizantë dhe anëtarësinë për të marrë edhe mendimin e tyre për përpilimin e listave për këshilltarë komunal dhe kandidatët më të mirë për kryetar komune të cilët duhet të jenë njerëz që dalin dhe i propozon populli.
