Është mbajtur ceremonia solemne për nder të 22-vjetorit të themelimit të Policisë së Kosovës.Në shënimin e kësaj dite, i pranishëm ishte edhe ministri i Punëve të Brendshme, Xhelal Sveçla, i cili tha që si pasojë e COVID-19 kanë vdekur 24 pjesëtarë të Policisë, kurse janë vaksinuar 7,912 dhe sipas tij priten të vaksinohen 1,268 policë.“Nga një vit e gjysmë pandemi Policia gjithmonë ka qëndruar në front vetëm e vetëm që të mbrojnë qytetarët dhe fatkeqësisht kemi 24 policë të vdekur nga pandemia”, tha Sveçla.
Sipas tij, kjo ditë do të festohej ndryshe por si pasojë e pandemisë organizimi u bë në mënyrë simbolike.Ndërsa Drejtori i Përgjithshëm i Policisë së Kosovës, Samedin Mehmeti kërkoi nga secili pjesëtar i policisë që të mos shkelin asnjëherë besimin e qytetarëve.“Puna e secilit pjesëtar të policisë është e lidhur ngushtë me punën dhe përgjegjësinë që kemi. Të sigurosh jetën dhe pronën e qytetarit është një përgjegjësi mjaft e madhe”, tha Mehmeti.Tutje ai nderoi dhe kujtoi 21 zyrtarët policorë që kanë rënë në detyrë dhe sipas tij ata janë frymëzim për të vazhduar përpara.
