Nxënësve në Angli do t’u ndalohet mbajtja e telefonave celularë me vete gjatë ditës shkollore, në kuadër të udhëzimeve më të rrepta qeveritare që do të hyjnë në fuqi nga shtatori i vitit 2027, transmeton Anadolu.
Udhëzimet e rishikuara do të shkojnë përtej politikave ekzistuese “nuk shihet, nuk dëgjohet”, të cilat u lejojnë nxënësve t’i mbajnë telefonat celularë në çantat e tyre, për sa kohë që ata nuk shihen ose nuk dëgjohen.
Sekretarja e Arsimit, Lucy Powell i tha BBC-së se “mesazhi i qartë” i qeverisë për prindërit dhe nxënësit ishte se “shkolla është vendi për të mësuar dhe për të krijuar miqësi, jo për të kaluar kohën duke lëvizur nëpër përmbajtjet e telefonit”.
Qeveria deklaroi se qasja në telefonat celularë “rrezikon t’i largojë fëmijët nga procesi mësimor dhe nga njëri-tjetri”. Shkollat do të kenë ende fleksibilitet në zbatimin e ndalimit, me mundësi që përfshijnë vendosjen e telefonave në qese të vulosura, dollapë të sigurt, grumbullimin e tyre në fillim të ditës ose ndalimin e pajisjeve në të gjithë hapësirat shkollore.
Megjithatë, drejtuesit e shkollave kanë paralajmëruar se masat më të rrepta do të kërkojnë financim shtesë nga qeveria. Paul Whiteman, sekretar i përgjithshëm i Shoqatës Kombëtare të Drejtuesve të Shkollave (NAHT) tha se telefonat celularë mund të krijojnë “çështje të sigurisë” dhe të shndërrohen në “shpërqendrime të padobishme”, por paralajmëroi se kufizimet më të forta “do të kenë kosto”.
Sekretari i përgjithshëm i Shoqatës së Drejtuesve të Shkollave dhe Kolegjeve, Pepe Di’Iasio tha se sigurimi i hapësirave të ruajtjes së sigurt për çdo nxënës do të ishte i kushtueshëm. “Kjo nuk është e realizueshme nëse qeveria nuk siguron fondet e nevojshme për të mbuluar këto kosto”, tha ai.
Sekretarja në hije e Arsimit, Laura Trott e mirëpriti ndalimin, por kritikoi atë që e përshkroi si mungesë të “mendimit të koordinuar” lidhur me teknologjinë që po futet në klasa.
Udhëzimet e reja mbështeten në rregullat detyruese që hynë në fuqi në qershor, duke i bërë shkollat dhe institucionet përgjegjëse për ruajtjen e mjediseve pa telefona celularë. Politika arsimore është kompetencë e deleguar, çka nënkupton se qasjet ndryshojnë në pjesë të ndryshme të Mbretërisë së Bashkuar.
