Ministri i Shëndetësisë, Sasho Klekovski, paralajmëroi formimin e një komisioni të posaçëm, i cili do të shqyrtojë rastin e Iva Mihajlovës, ndërsa në procesin e auditimit do të përfshihen edhe ekspertë nga jashtë vendit. Kjo vjen pas mbikëqyrjes fillestare inspektuese të Inspektoratit Shtetëror Sanitar dhe Shëndetësor, gjatë së cilës janë përfshirë disa institucione shëndetësore.
“Kemi përfunduar me mbikëqyrjen fillestare inspektuese nga Inspektorati Shtetëror Sanitar dhe Shëndetësor (ISHSSH). Janë përfshirë disa spitale, me përjashtim të Klinikës së Neurologjisë dhe spitaleve në Koçan, Shtip, si dhe një institucioni tjetër shëndetësor. Gjatë ditëve në vijim do të formoj një komision dhe, për shkak të ndjeshmërisë së rastit, do të kërkoj që ekspertë nga jashtë vendit të kryejnë një auditim të rastit – tha Klekovski pas takimit me gazetarët, ku prezantoi aktivitetet e realizuara dhe prioritetet strategjike gjatë tre muajve të fundit.
Ai theksoi se i gjithë dokumentacioni tashmë është mbledhur dhe se në vijim pritet shqyrtimi i tij i hollësishëm. Me formimin e komisionit dhe përfshirjen e ekspertëve të huaj, Ministria paralajmëron një verifikim shtesë të dokumentacionit mjekësor dhe të mënyrës së veprimit të institucioneve shëndetësore të përfshira në rast.
