Vaksinat BCG kundër tuberkulozit pritet të arrijnë në vend brenda pak ditësh, ndërsa imunizimi me vaksinën e prodhuesit bullgar “Bul Bio” është shtyrë përkohësisht pas raportimit të katër rasteve të dyshuara të inflamacionit të kockave te fëmijët në Kroaci.
Nga Instituti i Shëndetit Publik bëjnë të ditur se po kontrollohen cilësia e vaksinave dhe lidhja e mundshme me këto raste. Prindërit këshillohen të qëndrojnë të qetë dhe të kërkojnë vlerësim mjekësor nëse fëmijët shfaqin dhimbje, ënjtje të kockave ose vështirësi në lëvizje.
Ndërkohë, nga Ministria e Shëndetësisë rikujtojnë se vaksinimi kundër tuberkulozit është i detyrueshëm. Aktualisht, 95 pacientë po trajtohen për këtë sëmundje në vend.
