Kalifornia ka bërë një hap të ri në njohjen e festave të komunitetit mysliman, duke përfshirë zyrtarisht Fitër Bajramin dhe Kurban Bajramin në kalendarin e festave shtetërore.
Vendimi u formalizua përmes Projektligjit të Asamblesë 2017, i cili u nënshkrua nga guvernatori i Kalifornisë, Gavin Newsom, dhe tashmë ka hyrë në fuqi si ligj.
Sipas dispozitave të reja, institucionet arsimore publike, përfshirë shkollat dhe kolegjet komunitare, mund të vendosin mbylljen në ditët e këtyre festave, duke ndjekur procedurat që tashmë zbatohen në nivel lokal.
Ndërkohë, punonjësit e administratës shtetërore që plotësojnë kriteret përkatëse mund të përdorin edhe ditë pushimi në kuadër të festimeve të Fitër Bajramit dhe Kurban Bajramit.
Fitër Bajrami shënon përfundimin e muajit të shenjtë të Ramazanit, ndërsa Kurban Bajrami lidhet me periudhën e Haxhit dhe është një nga festat më të rëndësishme të besimit islam.
Në ligj theksohet se përfshirja e këtyre dy datave në kalendarin civil të Kalifornisë synon të pasqyrojë rëndësinë kulturore të tyre për komunitetet myslimane që jetojnë në shtet.
Me këtë ndryshim, Kalifornia i shton dy nga festat kryesore islame në listën e festave të njohura zyrtarisht nga shteti.
