Mbreti i Norvegjisë, Haakon VIII, është betuar të martën në parlament për besnikëri ndaj kushtetutës së vendit, një hap i rëndësishëm simbolik teksa merr drejtimin e vendit skandinav pas 35 vjetësh të mbretërimit të babait të tij të ndjerë.
Haakon është bërë monark i Norvegjisë pasi Mbreti Harald V vdiq të premten në moshën 89-vjeçare. Ai ka zgjedhur moton “Gjithçka për Norvegjinë”, e cila daton që nga stërgjyshi i tij.
Ai është transportuar me një veturë të hapur në distancën e shkurtër nga pallati mbretëror drejt Stortingut, ose parlamentit. Atje, kryetari i parlamentit, Masud Gharahkhani, ka lexuar njoftimin zyrtar për vdekjen e Haraldit dhe pasardhjen e Haakonit. Më pas, Haakoni, 53 vjeç, ka bërë betimin.
“Premtoj dhe betohem se do ta qeveris Mbretërinë e Norvegjisë në përputhje me Kushtetutën dhe ligjet e saj. Kështu më ndihmoftë Zoti, i Plotfuqishmi dhe i Gjithëdijshmi”, ka thënë ai.
Monarkia e Norvegjisë ka rrënjë të lashta me origjinën e saj te Mbreti Harald Flokëbukuri në shekullin e nëntë. Kur Norvegjia rifitoi pavarësinë nga Suedia në vitin 1905, tre të katërtat e votuesve në një referendum kombëtar miratuan rikthimin e monarkisë.
Sot, roli i saj është kryesisht simbolik, pasi pushteti qëndron te qeveria e zgjedhur dhe parlamenti, por familja mbretërore e vendit vazhdon të ketë një rol në promovimin e këtij vendi të pasur në mbarë botën.
Të hënën, arkivoli i Haraldit është dërguar në kapelën e pallatit mbretëror në qendër të Oslos, ku do të qëndrojë deri në ceremoninë e varrimit më 9 shtator.
Nga pasditja e së martës deri më 8 shtator, kapela do të jetë e hapur çdo ditë për publikun, në mënyrë që njerëzit të kalojnë pranë arkivolit dhe t’i bëjnë nderimet e fundit. Pallati mbretëror ka thënë në një deklaratë se vizitorëve nuk do t’u lejohet të bëjnë fotografi apo të filmojnë brenda kapelës dhe as të lënë lule apo sende të tjera.
