Yair Netanyahu, djali i kryeministrit izraelit Benjamin Netanyahu, ka shkaktuar reagime nga figura të së djathtës ekstreme britanike pasi mbështeti pretendimin e Argjentinës për sovranitet mbi Ishujt Falkland.
E përditshmja izraelite Haaretz raportoi se Yair Netanyahu shkroi në spanjisht në rrjetin social amerikan X se Ishujt Falkland i përkasin Argjentinës, duke i quajtur ata “Islas Malvinas”, emërtimi i preferuar nga Argjentina. Ai i përshkroi ishujt si “një grumbull shkëmbinjsh” që ndodhen mijëra kilometra larg Britanisë.
Komentet e tij erdhën teksa kritikonte qeverinë laburiste të Mbretërisë së Bashkuar për atë që ai e përshkroi si “hipokrizi dhe armiqësi ndaj Izraelit”, të cilën gjithashtu e quajti “antisemite”.
Rupert Lowe, udhëheqësi i partisë britanike të së djathtës ekstreme Restore Britain, reagoi duke i kërkuar Izraelit të sqarojë nëse qëndrimi i Yair Netanyahut pasqyron qëndrimin e qeverisë izraelite.
“Pas ndërhyrjes së djalit të Netanyahut, i cili deklaroi se Ishujt Falkland i përkasin Argjentinës, është plotësisht legjitime të pyesim se cili është qëndrimi zyrtar i qeverisë izraelite për sovranitetin e Ishujve Falkland”, shkroi Lowe në X.
Lowe gjithashtu shpërndau postimin e Yairit dhe tha: “Ke mjaft probleme në Izrael ku duhet të përqendrohesh, Netanyahu. Ishujt Falkland janë britanikë dhe të tillë do të mbeten. Një qeveri e Restore Britain do të hyjë në luftë, nëse është e nevojshme, për ta garantuar këtë”.
Ish-deputeti dhe ish-ministri konservator, Conor Burns, gjithashtu kritikoi Yairin në një postim në X me gjuhë fyese, duke shkruar: “I dashur Nepoyahu, na lër rehat. Sinqerisht, miqtë e shumtë të Izraelit në Mbretërinë e Bashkuar (qëndrime edhe më të ashpra mund të dëgjohen nga shtetasit britanikë në Ishujt Falkland)”.
Presidenti argjentinas, Javier Milei, rishpërndau disa nga postimet e Yairit në X. Netanyahu më pas tha se komentet e tij duket se kanë “kontribuar në marrëdhëniet Izrael-Argjentinë… në kundërshtim me propagandën e së majtës”.
Nile Gardiner, ish-ndihmës i kryeministres britanike, Margaret Thatcher, e cila udhëhoqi Britaninë gjatë Luftës së Falklandit në vitin 1982, tha se Yair nuk përfaqëson qëndrimin zyrtar të qeverisë izraelite.
“Fatmirësisht, ky nuk është qëndrimi zyrtar i qeverisë izraelite. Banorët e guximshëm të Falklandit kanë saktësisht të njëjtën të drejtë për sovranitet, vetëvendosje dhe liri si populli jashtëzakonisht i guximshëm i Izraelit. Falklandi do të jetë gjithmonë britanik”, shkroi Gardiner në X, duke rishpërndarë deklaratën e Yairit.
Argjentina pretendon sovranitet mbi Ishujt Falkland, të cilët i quan Ishujt Malvinas, duke u thirrur në trashëgiminë nga Kurora Spanjolle dhe dekretet historike, ndërsa Britania ka ruajtur kontrollin dhe administrimin e arkipelagut që nga viti 1833.
Në fillim të viteve 1980, Argjentina dhe Britania zhvilluan atë që u bë e njohur si Lufta e Falklandit për arkipelagun e kontestuar.
Ishujt Falkland përbëhen nga dy ishuj kryesor, Falklandi Lindor dhe Falklandi Perëndimor, së bashku me më shumë se 700 ishuj më të vegjël. Arkipelagu shtrihet në një sipërfaqe prej rreth 12.200 kilometrash katrorë dhe ndodhet afërsisht 480 kilometra larg bregdetit jugor të Argjentinës, me një vijë bregdetare të vlerësuar në rreth 1.300 kilometra.
