Koreja e Jugut tronditet nga një skandal në polici, pasi një oficer në ishullin Jeju dyshohet se ka mbyllur në mënyrë të rreme rastet e personave të zhdukur vetëm për të shmangur ngarkesën e punës.
Oficeri, i identifikuar me mbiemrin Boo, u arrestua pasi dyshohet se falsifikoi të dhënat zyrtare dhe u tha familjarëve se kishte komunikuar me të afërmit e tyre të zhdukur, ndërsa në të vërtetë nuk kishte kryer hetime të tilla.
Sipas autoriteteve, pas zbulimit të skandalit disa prej dosjeve janë rihapur. Në javët e fundit janë gjetur katër trupa, ndërsa policia po verifikon nëse oficeri ka mbyllur në mënyrë të parakohshme edhe 25 raste të tjera zhdukjesh.
Në një prej rasteve, 37-vjeçarja Jang Mi-ran u raportua e zhdukur në maj nga partneri i saj. Oficeri dyshohet se i tha partnerit se kishte komunikuar me gruan dhe se ajo nuk dëshironte të takohej apo të kishte kontakt me policinë. Hetimet zbuluan më vonë se një komunikim i tillë nuk kishte ndodhur.
Trupi i Jang u gjet javën e kaluar pranë një plantacioni palmash në ishullin Jeju. Në një tjetër rast, një burrë rreth të 60-ave u raportua i zhdukur në korrik. Edhe në këtë rast, oficeri dyshohet se pretendoi se kishte folur me të dhe se ai nuk dëshironte të kontaktonte askënd. Burri u gjet i vdekur në fillim të këtij muaji.
Përballë hetuesve, oficeri dyshohet se ka pranuar se i kishte trajtuar me lehtësi rastet që përfshinin persona të rritur, pasi mbyllja e tyre do ta lehtësonte ngarkesën e tij. Ai akuzohet për falsifikim të të dhënave elektronike publike, pengim të detyrës zyrtare dhe shpërdorim detyre.
Tashmë autoritetet po shqyrtojnë dosjet e tjera të trajtuara prej tij, për të përcaktuar nëse ka pasur raste të tjera ku hetimet janë mbyllur pa u verifikuar realisht fati i personave të zhdukur.
Skandali ka marrë edhe përmasa politike në Korenë e Jugut. Presidenti Lee Jae-myung ka premtuar reforma në polici, ndërsa qeveria po përpiqet t’i japë policisë kompetenca më të mëdha hetimore në kuadër të ndryshimeve në sistemin e drejtësisë.
Rasti ka shkaktuar reagime të forta, pasi zgjerimi i kompetencave të policisë po diskutohet në një kohë kur ndaj strukturave policore janë ngritur kritika për korrupsion dhe paaftësi.
