Maqedonia e Veriut vazhdon të përballet me një trend negativ demografik. Të dhënat e fundit për lëvizjen natyrore të popullsisë tregojnë se edhe në tremujorin e dytë të vitit numri i vdekjeve ka qenë më i lartë se numri i lindjeve, duke rezultuar me një shtim natyror negativ prej 1005 personash. Shifrat e reja rikthejnë në vëmendje sfidat demografike me të cilat përballet vendi, veçanërisht rënien e lindshmërisë dhe plakjen e popullsisë.
“Në tremujorin e dytë të vitit 2026, numri i lindjeve të gjalla është 3 684 fëmijë në krahasim me periudhën e njëjtë të vitit të kaluar, numri i tyre është zvogëluar për 3.0 për qind Në tremujorin e dytë të vitit 2026 kanë vdekur 4 689 persona, nga të cilët 10 foshnje, që vërehet rënie për 0.6 për qind në krahasim me tremujorin e njëjtë të vitit 2025. Shtimi natyrorë është negativ dhe është – 1 005, që do të thotë, për kaq persona është më i vogël numri i lindjeve të gjalla nga numri i vdekjeve. Në këtë tremujor të vitit janë lidhur 2 732 martesa, ndërsa numri i tyre është zvogëluar për 2.2 për qind krahasuar me periudhën e njëjtë të vitit 2025, ndërsa janë regjistruar 406 divorce”, thuhet në publikimin e të dhënave nga ESHS.
Të dhënat e reja dëshmojnë se sfida demografike mbetet një nga problemet më serioze për vendin. Numri më i ulët i lindjeve në raport me vdekjet tregon për një trend që mund të ketë pasoja afatgjata në strukturën dhe zhvillimin e popullsisë. Përmirësimi i kushteve për familjet dhe krijimi i mundësive më të mira për të rinjtë mbeten ndër faktorët kyç për përballimin e këtij trendi.
