Mickoski do ta priste me kënaqësi Trumpin në nivelin më të lartë nëse ai do të vinte në vend
Mickoski pret që gjatë vizitës së tij të ardhshme në SHBA, në kuadër të Asamblesë së Përgjithshme të OKB-së në Nju Jork, të mund të nënshkruhet marrëveshja bilaterale ndërmjet dy vendeve.
Maqedonia mbështet fuqishëm presidentin amerikan Donald Trump dhe administratën e tij dhe dëshiron që dialogu strategjik me Uashingtonin të shndërrohet në rezultate konkrete në fushën e sigurisë, energjisë, infrastrukturës, tregtisë dhe investimeve, deklaroi kryeministri Hristijan Mickoski në një intervistë ekskluzive për „Breitbart News“.
Mickoski thekson se mbështetja për Trumpin nga qeveria maqedonase kishte filluar edhe para se ai të zgjidhej sërish president i SHBA-së. Maqedonia ishte ndër vendet e para evropiane që vendosën kontakte me njerëz nga ekipi i Trumpit gjatë fushatës së tij zgjedhore në vitin 2024.
Menjëherë pas samitit të NATO-s në Uashington, në korrik 2024, Maqedoninë e vizitoi një ekip bashkëpunëtorësh të Trumpit. Qeveria maqedonase edhe atëherë dërgoi një mesazh të qartë se ishte e gatshme për thellimin e bashkëpunimit me SHBA-në.
Pas zgjedhjes së Trumpit president, një delegacion qeveritar maqedonas mori pjesë në inaugurimin e tij në Uashington, duke e shfrytëzuar këtë si një mundësi tjetër për të konfirmuar mbështetjen ndaj administratës së re amerikane dhe për të diskutuar bashkëpunimin e ardhshëm.
– Edhe para se të bëhej president i Shteteve të Bashkuara të Amerikës, disa nga njerëzit që janë pjesë e rrethit të tij më të afërt na vizituan gjatë fushatës, kur nuk kishte shumë vende evropiane që besonin se Trumpi do të bëhej president. Ne u zgjodhëm si qeveri në qershor 2024. Menjëherë pas samitit të NATO-s në Uashington, në korrik 2024, një ekip bashkëpunëtorësh të presidentit Trump na vizitoi në qeveri dhe praktikisht në atë kohë ishim qeveria e vetme që priti anëtarë të ekipit të presidentit Trump. Mes tyre ishin sekretari i Tregtisë, Howard Lutnick, ish-kongresmeni Devin Nunes dhe Chris Pavlovski, pronari i „Rumble“, me origjinë maqedonase. Ata na vizituan në qeveri dhe ne përcollëm një mesazh të fuqishëm mbështetjeje për Trumpin para se të bëhej president. Më pas, kur u zgjodh president, u ftova në ceremoninë e inaugurimit dhe një delegacion i qeverisë maqedonase vizitoi Uashingtonin në atë kohë, ku përcollëm mesazhin tonë për mbështetje dhe gatishmëri për rritjen e bashkëpunimit të ardhshëm – deklaroi Mickoski.
Ai thekson se mbështetja për Trumpin në Maqedoni është shumë e lartë, më e lartë se kudo në Evropë, dhe se do ta priste me kënaqësi Trumpin në vend, nëse agjenda e presidentit amerikan do ta lejonte një gjë të tillë.
