Një gjykatë federale në SHBA ka shfuqizuar ndalimin e lëshimit të vizave të emigrantëve për shtetasit e 75 vendeve, mes tyre edhe Maqedonisë së Veriut. Vendimi lidhet me një masë të administratës së Presidentit Donald Trump, të cilën gjykatësja Janet Vargas e cilësoi si “në kundërshtim me ligjin” dhe përtej kompetencave ligjore të Sekretarit të Shtetit, Marco Rubio.
Ndalimi, i vendosur në janar, bllokonte dhënien e vizave për qëndrim të përhershëm për qytetarët e këtyre vendeve. Në listë, krahas Maqedonisë së Veriut, ndodheshin edhe Mali i Zi, Bosnja dhe Hercegovina e Kosova, si dhe shtete të tjera nga Ballkani, Lindja e Mesme, Afrika, Azia dhe Karaibet.
Për shtetasit e RMV-së, kjo masë pengonte lëshimin e vizave për personat që synonin të vendoseshin në Shtetet e Bashkuara, përfshirë ata që dëshironin të bashkoheshin me familjarët ose të shkonin atje për punësim. Vizat jo-emigruese, si ato turistike dhe studentore, nuk përfshiheshin në ndalim.
Administrata Trump e mbrojti vendimin me argumentin se ai ishte i nevojshëm për të ndaluar hyrjen e personave që mund të vareshin nga ndihma sociale dhe përfitime të tjera publike.
Megjithatë, gjykatësja Vargas konstatoi se zyrtarët konsullorë amerikanë në praktikë ishin udhëzuar t’i refuzonin aplikimet vetëm mbi bazën e vendit të origjinës së aplikantit, edhe në rastet kur ai kishte mundësi të siguronte jetesën e vet.
Legjislacioni amerikan kërkon që refuzimi i një vize imigruese për shkak të rrezikut që aplikanti të bëhet “barrë për fondet publike” të mbështetet në një shqyrtim individual. Në këtë vlerësim duhet të përfshihen gjendja financiare, mosha, shëndeti, aftësitë dhe rrethanat familjare të personit.
Vargas anuloi të gjitha refuzimet e vizave të bazuara vetëm në pretendimin se aplikanti do të përbënte barrë për fondet publike. Vendimi përbën një tjetër goditje gjyqësore ndaj politikës së imigracionit të administratës Trump.
Gjykatësja Vargas u caktoi palëve afat deri më 11 shtator për të paraqitur një mënyrë për trajtimin e çështjeve që kanë mbetur pezull në këtë rast. Administrata amerikane mund ta apelojë vendimin.
