Rritja e pagës mesatare po shndërrohet në një tjetër front të përplasjes politike mes pushtetit dhe opozitës. Ndërsa kryeministri Hristijan Mickoski pretendon se pagat gjatë qeverisjes së VMRO-DPMNE-së po rriten dukshëm më shpejt se gjatë periudhës së qeverisjes së mëparshme, të dhënat statistikore të përdorura për krahasim tregojnë një ritëm pothuajse të njëjtë të rritjes mujore relative.
Sipas të dhënave zyrtare të Entit Shtetëror të Statistikave, paga mesatare mujore neto në periudhën nga qershori 2017 deri në maj 2024, kur në pushtet ishte LSDM, dhe në periudhën nga korriku 2024 deri në qershor 2026, gjatë qeverisjes së VMRO-DPMNE-së, shënon një dinamikë relativisht të ngjashme në përqindje.
Përllogaritjet e normës së përbërë mujore të rritjes, të llogaritur përmes mesatares gjeometrike, tregojnë se paga në të dy periudhat është rritur me një ritëm relativ prej rreth 0.72 deri në 0.73 për qind në muaj. Në periudhën e parë, që zgjati shtatë vjet, nga qershori i vitit 2017 deri në maj të vitit 2024, paga mesatare neto është rritur nga 22.808 denarë, ose rreth 371 euro, në 41.252 denarë, rreth 671 euro. Kjo paraqet rritje prej 18.444 denarësh, përkatësisht 80.87 për qind, transmeton KOHA.
Në terma nominalë, kjo nënkupton një rritje mesatare prej rreth 222 denarësh në muaj, ndërsa norma e përbërë mujore e rritjes është rreth 0.72 për qind. Në periudhën e dytë, nga korriku i vitit 2024 deri në qershor të vitit 2026, paga mesatare neto është rritur nga 40.961 denarë, rreth 666 euro, në 48.381 denarë, ose rreth 787 euro.
Kjo paraqet rritje prej 7.420 denarësh, përkatësisht 18.11 për qind. Rritja mesatare nominale mujore në këtë periudhë është rreth 323 denarë, ndërsa norma relative e rritjes mbetet pothuajse në të njëjtin nivel – rreth 0.73 për qind në muaj. Dallimi në rritjen nominale mujore, ku në periudhën 2024–2026 paga është rritur me shumë më tepër denarë në muaj krahasuar me periudhën 2017–2024, lidhet kryesisht me bazën më të lartë fillestare, harmonizimet me inflacionin dhe rritjen e pagës minimale.
Megjithatë, pikërisht interpretimi i këtyre shifrave ka shkaktuar polemika politike. Kryeministri Hristijan Mickoski, në një paraqitje televizive në Sitel, tha se rritja e pagës mesatare gjatë mandatit të qeverisë së tij është për 70 për qind më e lartë në krahasim me periudhën e qeverisjes së mëparshme. “Paga mesatare, nëse analizoni 84 muaj qeveri të LSDM-së dhe BDI-së… Nëse analizoni rritjen e pagës mesatare në atë periudhë dhe e krahasoni me rritjen e pagës mesatare nga korriku i vitit 2024, i cili është muaji ynë i parë si Qeveri e udhëhequr nga VMRO-DPMNE-ja, së bashku me partnerët e koalicionit ZNAM dhe VLEN, dhe të dhënat e fundit që i ka publikuar Enti Shtetëror i Statistikave, do të arrini në përfundimin se paga mesatare në këtë periudhë të kësaj Qeverie rritet për 70 për qind më shumë krahasuar me periudhën e qeverisë së mëparshme. Këto janë shifra. Këto shifra nuk mund t’i gënjeni”, deklaroi Mickoski.
Krahasimi i të dhënave tregon se, edhe pse rritja nominale mujore është më e lartë në periudhën 2024–2026, ritmi relativ i rritjes mujore është pothuajse identik me atë të periudhës 2017–2024. Kjo e bën pagën mesatare një tjetër pikë të fortë të debatit politik, ku e njëjta statistikë interpretohet ndryshe nga pushteti dhe opozita, në varësi të periudhës dhe metodologjisë së krahasimit.
