Policia ka ngritur kallëzime penale ndaj një ish-drejtori dhe dy personave të tjerë nga Kombinati i Duhanit në Prilep, të cilët dyshohet se e kanë dëmtuar buxhetin e kompanisë për më shumë se 3.3 milionë denarë, përmes veprimeve kriminale të lidhura me shitjen e hekurit të mbeturinave.
MPB njoftoi se SPB Manastir ka ngritur kallëzime penale ndaj tre personave fizikë dhe një personi juridik nga Prilepi, për disa vepra penale, me të cilat dyshohet se i kanë shkaktuar dëm buxhetit të Kombinatit të Duhanit në Prilep në vlerë prej mbi 3.3 milionë denarësh.
Bëhet fjalë për Lj.B. (59) nga Prilepi, ndaj të cilit është ngritur kallëzim për dyshime për veprat penale “përvetësim në shërbim”, “keqpërdorim i pozitës dhe autorizimit zyrtar” dhe “falsifikim i dokumentit zyrtar”.
Ndaj K.S. (60) është ngritur kallëzim për veprën “punë e pakujdesshme në shërbim”, ndërsa ndaj J.D. (41) për veprat “fshehje” dhe “falsifikim i dokumentit zyrtar”.
Kallëzim penal është ngritur edhe ndaj një personi juridik nga fshati Malo Konjari i Prilepit, për shkak të dyshimit për kryerjen e veprës penale “fshehje”.
