SHBA-të presin që Hamasi të nisë së shpejti procesin e çarmatosjes në Gaza, ndërsa Uashingtoni është i gatshëm të mbështesë veprime të mëtejshme ushtarake të Izraelit nëse grupi palestinez nuk përmbush angazhimet e tij
I dërguari special i SHBA-së, Jared Kushner, tha se mund të ketë përparim të shpejtë në Gaza nëse palët bashkëpunojnë. Në një intervistë për Fox News, pas takimit me kryeministrin izraelit Benjamin Netanyahu, Kushner tha se Hamasi ka 60 deri në 90 ditë për të treguar se është i gatshëm të çarmatoset. “Nëse Hamasi i dorëzon armët në tunele me dëshirë gjatë 60 deri në 90 ditëve të ardhshme, kjo do të ishte eliminimi i një kërcënimi të madh sigurie për Izraelin”, tha Kushner.
Ai paralajmëroi se nëse Hamasi nuk e zbaton angazhimin për çarmatosje, Izraeli do të ketë mbështetje më të madhe nga SHBA-ja dhe vende të tjera për të ndërmarrë veprime të mëtejshme.
“Nëse nuk e zbatojnë tani angazhimin e tyre, të gjithë do të shohin se nuk janë të sinqertë për paqen dhe se Izraeli do të ketë shumë më tepër mbështetje nga SHBA-të dhe të tjerët për ta përfunduar punën në mënyrën e duhur”, tha ai.
Kushner tha se përfaqësuesit e Hamasit gjatë takimit të së dielës “thanë të gjitha gjërat e duhura”, por shtoi se SHBA-të kanë vështirësi t’u besojnë për shkak të së kaluarës së organizatës.
Sipas tij, tani Hamasit do t’i jepet mundësia të tregojë me veprime nëse është serioz për procesin e paqes.
Kushner zhvilloi gjithashtu një takim rreth katërorësh me Benjamin Netanyahun, të cilin e përshkroi si “shumë, shumë të mirë”. Ai tha se gjatë takimit u diskutuan shqetësimet e kryeministrit izraelit, përfshirë të drejtën e Izraelit për t’u mbrojtur dhe procesin e rindërtimit të Gazës.
Sipas Kushner, hapat e parë mund të ndërmerren brenda 30 ditëve, me synimin për të filluar nxjerrjen e armëve nga tunelet dhe më pas trajtimin e rrjetit të tuneleve gjatë 60-90 ditëve të ardhshme.
