Çfarë është Ningeni, krijesa misterioze që i ngjan një sirene në legjendat japoneze?

Në mesin e viteve 2000, në një forum të njohur japonez në internet filluan të qarkullonin rrëfime për një krijesë të çuditshme detare të quajtur Ningen. Megjithëse shumë besojnë se legjenda lindi në internet, disa mendojnë se historia e saj mund të ketë rrënjë shumë më të vjetra, që shkojnë deri në vitet 1950.

Në ujërat e ftohta dhe të izoluara të Antarktidës, thuhet se fshihet një përbindësh misterioz. I njohur si Ningen, ai përshkruhet si një krijesë me ngjyrë të bardhë si fantazmë dhe me gjatësi më të madhe se një balenë blu. Ajo që e bën edhe më të frikshëm është se thuhet se ka tipare njerëzore, përfshirë duar me pesë gishta dhe sy të zinj, tëmëdhenj, të palëvizshëm dhe me shkëlqim vajor.

Pra, çfarë është në të vërtetë Ningeni?

Ndërsa disa besojnë se kjo krijesë misterioze japoneze u shpik në forumet e internetit, të tjerë mendojnë se ka pasur raportime të vërteta për të që nga vitet 1950.

Kjo është historia e pazakontë e Ningenit, krijesës misterioze detare japoneze që, sipas disa njerëzve, jeton pranë Antarktidës.

Çfarë është Ningeni?

Ningeni është një krijesë misterioze detare nga folklori modern japonez, e përshkruar si një përbindësh gjigant me ngjyrë të bardhë që jeton në ujërat e akullta pranë Antarktidës.

Thuhet se Ningeni arrin deri në 30 metra gjatësi dhe ka të njëjtën ngjyrë dhe pamje si blloqet e akullit që notojnë përreth. Pikërisht për këtë arsye është shumë e vështirë të dallohet. Megjithatë, ata që pretendojnë se e kanë parë e përshkruajnë pothuajse gjithmonë në të njëjtën mënyrë.

Edhe më shqetësuese është ideja se Ningen ka tipare të ngjashme me ato të njeriut, përfshirë krahë, këmbë dhe duar me pesë gishta. Fjala “ningen” në japonisht do të thotë “njeri”, ndërsa krijesa njihet edhe si “hitogata”, që do të thotë “humanoid”. Disa pretendojnë se duart e saj kanë membrana si ato të rosës ose se ajo ka një bisht të ngjashëm me atë të sirenave. Sipas Science Insights, të tjerë thonë se krijesa ka pendë ose tentakula.

Megjithatë, pothuajse të gjithë bien dakord për një detaj: Ningeni ka sy të mëdhenj, të zinj, pa asnjë shprehje dhe pa pulitur, të cilët bien menjëherë në sy mbi fytyrën e saj të bardhë si akulli.

Pavarësisht përmasave të saj gjigante, Ningeni nuk përshkruhet si një krijesë agresive. Raportimet për të janë aq të rralla, sa dihet shumë pak për sjelljen e saj.Por nga lindi kjo legjendë?

Origjina e paqartë e përbindëshit të detit të Antarktidës

Ashtu si shumë krijesa të tjera misterioze moderne, përfshirë Slenderman dhe Fresno Night crawler, historitë për Ningenin duket se kanë lindur fillimisht në internet. Në fillim të viteve 2000, përshkrimet e kësaj krijese nisën të përhapeshin në forumin anonim japonez 2channel.

Sipas një studimi të botuar në vitin 2020 në The International Journal of Research into Island Cultures, historia e Ningenit u bë e njohur jashtë internetit në vitin 2007, kur revista japoneze Mu publikoi një artikull për një pamje të mundshme të krijesës.

Revista shkroi për një krijesë të bardhë detare, rreth 18 metra të gjatë, e cila dukej se ishte fotografuar në Google Earth pranë brigjeve të Namibisë.

“Duke marrë parasysh madhësinë e saj,” shkruante revista, “mund të bëhet fjalë për një përbindësh me formë njerëzore të quajtur Ningen ose Hitogata.”

Megjithëse revista theksonte se historitë për Ningenin kishin filluar së fundmi të qarkullonin në internet, ajo i lidhi ato edhe me një raportim shumë më të hershëm. Gati 50 vjet përpara se krijesa të bëhej e famshme në 2channel, ekuipazhi i anijes kërkimore Soya-maru pretendoi se kishte parë një krijesë të çuditshme detare gjatë një ekspedite në Gjirin Lützow-Holm në Antarktidë.

Sipas Cryptid Wiki, në vitin 1958 ekuipazhi pa në ujërat e akullta një krijesë që “i ngjante një balene me fytyrë majmuni”. Një prej marinarëve vrapoi të merrte aparatin fotografik, por kur u kthye në kuvertë, krijesa ishte zhdukur sërish nën valë. Cryptid Wiki e quan atë “Godzilla e Antarktidës”, ndërsa revista Mu sugjeroi se mund të ishte pikërisht Ningen.

Revista Mu nuk ishte e vetmja që shkroi për këtë krijesë. Për shembull, Daily Mirror publikoi në vitin 2016 një artikull mbi një pamje të mundshme të Ningenit, duke e përshkruar si një “përbindësh misterioz me pamje njerëzore dhe trup të dhjamosur, i filmuar duke notuar në ujërat e akullta të Antarktidës”.

Pra, a ekziston vërtet Ningeni? Dhe nëse jo, si mund të shpjegohen raportimet për këtë krijesë misterioze?

Ningeni: Ajsberg, iluzion, përbindësh deti apo diçka tjetër?

Ndoshta në ujërat e akullta pranë Antarktidës fshihet vërtet një krijesë e panjohur. Ose ndoshta njerëzit kanë ngatërruar diçka tjetër me Ningenin.

Sipas Science Insights, është e mundur që ata që besojnë se e kanë parë, si ekuipazhi i Soya-maru, të kenë parë në të vërtetë ajsbergë lundrues ose balena albine. Po ashtu, raportimet mund të jenë shkaktuar nga fenomeni optik i njohur si Fata Morgana, i cili krijon mirazhe mbi sipërfaqen e detit. Ky fenomen besohet se ka qenë burimi i shumë legjendave për anije fantazmë, si Holandezi Fluturues.

Nga ana tjetër, është e mundur që legjenda e Ningenit të jetë formuar edhe nga elemente të historisë dhe kulturës japoneze.

Në studimin e botuar në The International Journal of Research into Island Cultures, studiuesja Felicity Greenland nga Universiteti i Kiotos sugjeron se legjenda e Ningenit mund të lidhet me traditën japoneze të gjuetisë së balenave. Sipas saj, historia e kësaj krijese “ndërthuret me historinë shoqërore dhe politike të Japonisë në lidhje me gjuetinë e balenave që nga vitet 1930”. Në këtë kuptim, legjenda e Ningenit mund të krahasohet me atë të Godzillës, përbindëshit që lindi si simbol pas bombardimeve atomike të Hiroshimës dhe Nagasakit.

Pavarësisht se nga e ka origjinën kjo histori, Ningen vazhdon të zgjojë kureshtjen e studiuesve të krijesave misterioze edhe sot. Për disa ai është vetëm një iluzion optik ose një ajsberg i keqinterpretuar, ndërsa të tjerë janë të bindur se një krijesë e tillë jeton ende në thellësitë e ngrira të Antarktidës, ku errësira, të ftohtit dhe akulli e fshehin nga sytë e njerëzve.