Angelina Jolie është shfaqur me një pamje të zymtë në Beverly Hills, ndërsa beteja e saj ligjore me ish-bashkëshortin Brad Pitt vijon të marrë një tjetër kthesë.
Aktorja 51-vjeçare u fotografua të premten teksa largohej nga një garazh parkimi, e veshur me të zeza, me një çantë lëkure në krah dhe syze dielli.
Dalja e saj vjen në një moment të rëndësishëm të përplasjes ligjore mes dy yjeve të Hollywood-it, e cila lidhet me pronësinë e vreshtarisë së tyre franceze, Chateau Miraval.
Për këtë çështje është planifikuar një gjyq në shkurt të vitit 2027, ndërsa së fundmi avokatët e Pitt i kanë kërkuar gjykatës që Jolie të dorëzojë dokumente financiare shtesë.
Sipas dokumenteve gjyqësore, ekipi ligjor i aktorit kërkon të shqyrtojë të ardhurat e Jolie-s për periudhën 2017–2019. Kërkesa lidhet me pretendimet e aktores se pas ndarjes së çiftit ajo kishte lënë pjesërisht në pauzë karrierën e saj dhe kishte hequr dorë nga vite të ardhurash.
Jolie thuhet se kishte rënë dakord të dorëzonte dokumentacion financiar për periudhën 2017–2021. Megjithatë, avokatët e Pitt pretendojnë se deri tani ajo ka paraqitur vetëm dokumentet për vitet 2020 dhe 2021.
Ekipi ligjor i aktorit argumenton se disa prej dokumenteve të kërkuara ende nuk janë vënë në dispozicion.
Nga ana tjetër, në dokumentet e saj gjyqësore, Jolie ka deklaruar se pas ndarjes në vitin 2016 kishte pezulluar pjesërisht karrierën dhe se në vitin 2019 kishte arritur në përfundimin se shitja e interesit të saj në Chateau Miraval ishte e nevojshme për të siguruar pavarësinë e saj financiare.
Përplasja ligjore mes Jolie dhe Pitt, e cila prej vitesh ka mbajtur vëmendjen e mediave, pritet të vazhdojë edhe gjatë muajve të ardhshëm.
Me gjyqin e planifikuar për shkurtin e vitit 2027, beteja për Château Miraval dhe dokumentet financiare duket se është ende larg fundit.
