Omega-3 nuk lidhet vetëm me përfitimet për zemrën dhe trurin, por mund të ketë ndikim pozitiv edhe në cilësinë e gjumit, sipas disa hulumtimeve shkencore.
Një studim i zhvilluar nga studiues të Universitetit të Oksfordit ka sugjeruar se marrja e suplementeve me omega-3 mund të ndihmojë në një gjumë më të qetë dhe më të gjatë.
Në një hulumtim të vitit 2014, fëmijët e moshës 7 deri në 9 vjeç që morën suplemente omega-3 për 16 javë, treguan përmirësime në cilësinë e gjumit. Studiuesit përdorën sensorë të vendosur në duar për të monitoruar kohën e fjetjes dhe zgjimet gjatë natës.
Në fund të studimit, fëmijët flinin mesatarisht rreth 58 minuta më shumë dhe zgjoheshin më rrallë gjatë natës krahasuar me fillimin e hulumtimit.
Sipas autorit të studimit, Dr. Paul Montgomery, efektet e omega-3 mund të kenë ndikim edhe te të rriturit, megjithëse nevojiten më shumë kërkime për ta konfirmuar këtë.
Studiuesit mendojnë se një nga arsyet mund të lidhet me ndikimin e acideve yndyrore omega-3 në uljen e ankthit ose në ndihmën për prodhimin e melatoninës, hormonit që ndihmon trupin të përgatitet për gjumë.
