Zëvendësministri i Shëndetësisë, Jovica Andovski, zhvilloi një takim pune me përfaqësuesit e Shoqatës HEMA-ONKO – shoqatë e përkushtuar ndaj pacientëve me kancer dhe kujdestarëve të tyre – si dhe me përfaqësueset e grupit Fluturat. Në takim u diskutua për nevojat aktuale të pacientëve dhe për përmirësimin e kujdesit shëndetësor.
Në fokus të takimit ishte Ligji i ri për barnat, me ç’rast përfaqësuesit e shoqatës paraqitën rekomandimet dhe propozimet e tyre. Zëvendësministri theksoi se organizatat e pacientëve duhet të përfshihen në mënyrë aktive në hartimin e politikave dhe të zgjidhjeve ligjore që prekin drejtpërdrejt pacientët.
Bashkëbiseduesit diskutuan edhe për mundësitë e thellimit të bashkëpunimit me Zyrën e Organizatës Botërore të Shëndetësisë, me qëllim zbatimin e përvojave ndërkombëtare dhe praktikave të mira, përmirësimin e planifikimit dhe ndërtimin e një sistemi shëndetësor më efikas dhe më të qëndrueshëm.
Në takim u shqyrtua edhe gjendja me terapinë onkologjike, si dhe masat që po ndërmerren për tejkalimin e sfidave shumëvjeçare me të cilat përballen pacientët. U theksua se është siguruar një rritje rekord e buxhetit për onkologjinë dhe se po punohet për përmirësimin e qasjes dhe vazhdimësisë së terapisë.
Për barnat, furnizimi i të cilave ka pasur vonesa, tashmë janë ndërmarrë masa konkrete. Një pjesë e dërgesave është realizuar, për një pjesë janë lidhur kontrata të reja, ndërsa për barnat e tjera po sigurohen zgjidhje të përkohshme deri në normalizimin e plotë të gjendjes.
Gjithashtu, u diskutua për diagnostikimin në kohë, informimin më të mirë të pacientëve, thjeshtimin e procedurave administrative dhe sfidat e tjera në realizimin e të drejtave nga kujdesi shëndetësor.
Zëvendësministri theksoi se Ministria e Shëndetësisë mbetet e hapur për bashkëpunim të rregullt, thelbësor dhe transparent me HEMA-ONKO-n, grupin Fluturat dhe të gjitha organizatat e pacientëve.
“Pacientët dhe përfaqësuesit e tyre janë partnerët tanë në krijimin e një sistemi më të mirë shëndetësor. Përmes dialogut të hapur dhe punës së përbashkët do të vazhdojmë të krijojmë zgjidhje sistemore dhe të qëndrueshme, në të cilat pacienti do të jetë në qendër të çdo vendimi”, theksoi zëvendësministri.
