Presidenti ukrainas Volodymyr Zelenskyy ka paralajmëruar për një sulm të ri dhe “masiv” rus ndaj Ukrainës, shkruan Euronews.
Në një postim në X, lideri ukrainas tha se informacionet e inteligjencës tregonin se Moska kishte “përgatitur raketa” për një sulm “brenda 48 orëve të ardhshme”.
“Ju lutem, kujdesuni për veten dhe kushtojuni vëmendje alarmeve për sulme ajrore,” shkroi ai.
Kjo vjen pasi autoritetet ukrainase njoftuan se sulmet ruse me raketa në rajonin e Kievit, të kryera të premten, lanë të vdekur të paktën 10 persona dhe plagosën rreth 100 të tjerë. Sipas raportimeve, sulmet goditën një ekspozitë armatimesh ku ishin të pranishëm përfaqësues të industrisë ukrainase të mbrojtjes.
Sipas Zelenskyy-t, edhe pesë persona të tjerë humbën jetën pas sulmeve me bomba ajrore të drejtuara në Slovyansk.
Ministri i Jashtëm i Letonisë konfirmoi se konsullata letoneze në Slovyansk u dëmtua gjatë sulmeve.
Duke reaguar ndaj lajmit përmes një deklarate në rrjetet sociale, Kaja Kallas, diplomatja kryesore e Bashkimit Evropian, tha se sulmi ndaj konsullatës “nxjerr në pah shpërfilljen totale të Moskës ndaj së drejtës ndërkombëtare”.
“Letonia e ka mbështetjen tonë të plotë,” shtoi ajo.
Sulmet ukrainase ndaj Rusisë
Të shtunën, Zelenskyy konfirmoi se forcat ukrainase kishin kryer sulme ndaj një objekti armatimesh në Kirov, të premten në mbrëmje.
Ai tha se Ukraina gjithashtu kishte vënë në shënjestër një rafineri nafte në Tyumen, një objekt logjistik në Yekaterinburg dhe një depo karburanti e lubrifikantësh në Rostov-on-Don.
“Ne gjithashtu arritëm rezultate shumë të fuqishme me goditje me rreze të gjatë në Detin Kaspik – duke përfshirë anije që përdoreshin për transportin e ngarkesave ushtarake që përfshinin Iranin, si dhe një anije luftarake,” shtoi ai, ndërsa publikoi edhe pamje video që duket se tregojnë pasojat e disa prej goditjeve.
Në Ukrainë, një person humbi jetën dhe nëntë të tjerë u plagosën pas një sulmi rus në rajonin juglindor të Zaporizhzhia-s të shtunën, sipas autoriteteve lokale.
Zelenskyy do të takohet me Trumpin
Zelenskyy pritet të takohet me presidentin amerikan Donald Trump në Uashington javën e ardhshme, ndërsa SHBA-ja dhe Ukraina vazhdojnë të diskutojnë propozimet e paqes për t’i dhënë fund luftës, e cila nisi pas pushtimit rus në shkallë të plotë të Ukrainës në shkurt të vitit 2022.
Të mërkurën, Zelenskyy tha se kishte biseduar me të dërguarin e posaçëm amerikan Steve Witkoff dhe me Jared Kushner-in, dhëndrin e Trumpit, rreth përpjekjeve për t’i dhënë fund konfliktit.
“Një bisedë e mirë dhe e rëndësishme se si t’i jepet vrull diplomacisë dhe të afrohet paqja,” tha ai.
Në fillim të kësaj jave, ministri i Jashtëm rus Sergey Lavrov u takua me Sekretarin e Shtetit të SHBA-së, Marco Rubio, në margjinat e samitit të ministrave të jashtëm të ASEAN-it (Shoqata e Kombeve të Azisë Juglindore) në Filipine.
Sipas Kremlinit, Lavrovi e shfrytëzoi takimin për ta paralajmëruar Uashingtonin që të mos vazhdojë shitjen e armëve për Kievin.
“Lavrovi e informoi homologun e tij amerikan mbi situatën reale përgjatë vijës së frontit dhe theksoi se do të ishte e papranueshme që regjimi i Kievit të armatosej më tej”, thuhej në një deklaratë të Ministrisë së Jashtme ruse.
Duke folur për gazetarët pas takimit, Rubio tha se të dy patën një bisedë “të mirë” dhe “të hapur”, por nuk pranoi të jepte më shumë detaje.
I pyetur konkretisht për deklaratën e Kremlinit, Rubio tha: “Ne shesim armë përmes PURL-it, që është një iniciativë që e kemi në kuadër të NATO-s dhe pikërisht në këtë jemi të përfshirë. Nuk ka pasur asnjë ndryshim në politikën tonë lidhur me këtë çështje”.
“Ne duam një marrëveshje paqeje. Duam që lufta të marrë fund”, shtoi ai.
