Studimi: Kafja në mbrëmje mund të mos ndikojë aq sa mendohet në cilësinë e gjumit

Shumë njerëz besojnë se pirja e kafesë në orët e pasdites ose të mbrëmjes ndikon negativisht në cilësinë e gjumit. Megjithatë, një studim i kryer nga Universiteti i Floridës sugjeron se ndikimi i kafeinës mund të mos jetë aq i madh sa mendohet.

Në kuadër të studimit, një numër i madh pjesëmarrësish u monitoruan për gjashtë muaj. Gjatë kësaj periudhe, studiuesit analizuan sasinë e kafeinës, alkoolit dhe nikotinës që ata konsumonin, ndërsa të dhënat u krahasuan me ditarët e gjumit, ku regjistrohej kohëzgjatja dhe cilësia e gjumit, si edhe zgjimet gjatë natës.

Rezultatet treguan se konsumimi i alkoolit dhe nikotinës lidhej me çrregullime të gjumit, ndërsa kafeina nuk shfaqi një ndikim domethënës në cilësinë apo kohëzgjatjen e tij.

Studiuesit theksojnë se ky është një nga studimet më të mëdha që ka analizuar në mënyrë objektive lidhjen mes konsumimit të kafeinës, alkoolit dhe nikotinës në mbrëmje dhe efektit të tyre mbi gjumin.

Megjithatë, ekspertët kujtojnë se reagimi ndaj kafeinës ndryshon nga një person te tjetri. Disa individë mund të jenë më të ndjeshëm ndaj saj dhe të përjetojnë vështirësi për të fjetur, ndërsa të tjerë nuk vërejnë asnjë ndikim.