Trump: Kompanitë e IA duhet të mbulojnë kostot e energjisë për qendrat e të dhënave
Presidenti i Shteteve të Bashkuara të Amerikës, Donald Trump, ka deklaruar se kompanitë që zhvillojnë inteligjencën artificiale duhet të mbulojnë kostot e ndërtimit të infrastrukturës energjetike të nevojshme për funksionimin e qendrave të reja të të dhënave.
Trump u ka bërë thirrje komuniteteve lokale që të mbështesin ndërtimin e këtyre projekteve, duke i cilësuar ato si të rëndësishme për ruajtjen e epërsisë teknologjike të SHBA-së në garën globale për inteligjencën artificiale, raporton Associated Press, transmeton Klankosova.tv.
Duke folur në selinë e Agjencisë për Mbrojtjen e Mjedisit (EPA) në Washington, presidenti amerikan tha se më shumë se 220 kompani energjetike, teknologjike dhe qeveri shtetërore kanë nënshkruar një zotim për mbrojtjen e konsumatorëve që nga prezantimi i këtij plani në fillim të vitit.
Sipas Trump, ky plan tashmë mbulon tarifat e energjisë elektrike për rreth 80 për qind të energjisë së shpërndarë në SHBA.
Këto kompani po investojnë shuma të jashtëzakonshme parash në komunitetet lokale”, deklaroi Trump.
Ai gjithashtu pretendoi se disa vende të huaja po përpiqen të pengojnë zhvillimin e infrastrukturës amerikane të inteligjencës artificiale përmes asaj që ai e cilësoi si “propagandë” dhe fushata publike, me synim dobësimin e mbështetjes për ndërtimin e qendrave të të dhënave.
Nëse nuk e bëjmë këtë, do të mbetemi prapa. Duhet t’i bindni komunitetet tuaja për përfitimet e këtyre projekteve. Nuk mund t’i luftoni ato, duhet t’i përqafoni”, tha presidenti amerikan.
Trump i përshkroi komunitetet që mirëpresin qendrat e të dhënave si “komunitete të zgjuara”, duke theksuar se këto objekte sjellin mijëra vende pune dhe kanë ndikim të kufizuar në jetën e përditshme të banorëve.
