Nënkryetari i Lidhjes Demokratike të Kosovës (LDK), Lutfi Haziri, ka reaguar ndaj zhvillimeve dhe kritikave që po shoqërojnë partinë, duke theksuar se LDK do t’i tejkalojë sfidat përmes debatit të brendshëm dhe demokracisë.
Përmes një postimi në rrjetet sociale, Haziri tha se i kupton aktivistët dhe anëtarët që dëshirojnë ta shohin LDK-në sërish forcën e parë politike, por kritikoi ata që, sipas tij, fillimisht e lavdëruan partinë dhe më pas “shkruan nekrologji” për të.
Ai theksoi se LDK i takon anëtarësisë dhe jo funksionarëve, duke shtuar se partia ka kapacitet të përballet me sfidat e Republikës përmes marrëveshjeve politike, debatit të brendshëm dhe respektimit të demokracisë së brendshme.
“Pa LDK-në nuk ka as zgjidhje e as zgjedhje. Stabiliteti dhe normalizimi i Republikës kalon përmes zyrave të LDK-së”, ka shkruar Haziri, duke shtuar se rikthimi i madh i partisë do të vijë përmes një marrëveshjeje të gjerë politike, pa cenuar demokracinë e brendshme.
Postimi i plotë:
I duroj e mundohem me i kuptu krejt ata që merren me LDK-në duke na këshillu e mësu se qysh duhet me u sjell, çka duhet e çka nuk duhet të bëjmë. Bile edhe ata që shpesh ju referohen autoriteteve si ‘patericë’, ‘harrën’ e çka jo tjetër. E di saktë për kend e bëjnë e për çfarë agjendash. Punë përvoje, po get. Po bahen 38 vjet në politikë.
I kuptoj më së shumti aktivistat e militantët që vuajnë me zemër e me bindje dhe e duan LDK-në me qenë e para. Pa dalë e para, asnjë kryetar nuk e lënë rehat, duke ia kërku dorëheqjen.
Ama nuk i kuptoj ata që në fillim na lartësonin deri në qiell dhe më pas shkuan aq larg sa shkruan nekrologji për LDK-në. Mos u lodhni shumë, se LDK i takon anëtarësisë e jo funksionarëve.
LDK din e mundet me u përball me agjendën e Republikës, duke përballu kërkesat e saj me debat të brendshëm, marrëveshje politike apo demokraci të brendshme.
Periudha post-independente dhe post-Rugoviste, veç një gjë e ka konfirmu: që pa LDK-në nuk ka as zgjidhje e as zgjedhje.
Stabiliteti e normalizimi i Republikës kalon përmes zyrave të LDK-së! Ia kemi borxh anëtarësisë dhe të ardhmes së Republikës.
Koha më ka dhënë të drejtë që rikthimi i madh i LDK-së ndodh nga lart-poshtë, me marrëveshje të madhe politike, pa e dëmtu demokracinë e brendshme.
LDK ishte parti ringritëse në një kohë të pakohë, sepse kur krejt ishin rrëzu e dorëzu, LDK nisi ringritjen tonë, si shoqni e organizume.
