Presidenti i FIFA-s, Gianni Infantino, e ka cilësuar Kupën e Botës 2026 një sukses që “i tejkaloi të gjitha pritshmëritë”, gjatë një konference për shtyp në Nju Jork, ku ishte i pranishëm edhe Presidenti amerikan Donald Trump, në prag të finales mes Spanjës dhe Argjentinës.
“Ëndrra amerikane, zoti President, është bërë realitet. Ne kemi bashkuar botën”, deklaroi Infantino, duke falënderuar Trump për mbështetjen e dhënë gjatë organizimit të turneut.
Sipas kreut të FIFA-s, Botërori ka arritur objektivin e tij kryesor: të bashkojë njerëz nga e gjithë bota përmes futbollit.
“Ky Botëror i ka tejkaluar të gjitha pritshmëritë. Stadiumet kanë qenë të mbushura, shikueshmëria televizive ka qenë shumë e lartë dhe miliona njerëz janë bërë pjesë e këtij eventi”, tha ai.
Donald Trump e cilësoi Kupën e Botës 2026 si “një nga ngjarjet më të mëdha sportive të të gjitha kohërave”, duke shtuar se turneu ka bashkuar jo vetëm botën e sportit.
“I uroj fat Spanjës dhe Argjentinës në finale. Le të fitojë skuadra më e mirë”, deklaroi presidenti amerikan.
Trump dhe Infantino u shfaqën pranë trofeut të Kupës së Botës, të cilin presidenti amerikan do t’ia dorëzojë ekipit fitues pas finales së së dielës.
Sipas FIFA-s, Botërori 2026, i pari me 48 kombëtare pjesëmarrëse, ka vendosur rekorde të reja.
Janë zhvilluar 102 ndeshje në Shtetet e Bashkuara, Kanada dhe Meksikë, ndërsa stadiumet kanë qenë pothuajse të mbushura në çdo takim.
FIFA pret që numri total i spektatorëve të arrijë rreth 6.7 milionë, shifra më e lartë në historinë e Kupës së Botës, pavarësisht shqetësimeve fillestare për çmimet e larta të biletave dhe procedurat e hyrjes në Amerikën e Veriut.
Një ditë më parë, Infantino foli edhe në Organizatën e Kombeve të Bashkuara gjatë një sesioni kushtuar rolit të futbollit në shëndetin mendor të të rinjve.
Ai prezantoi një nga topat zyrtarë të finales së Kupës së Botës, duke e quajtur atë “një objekt magjik që ka fuqinë të bashkojë botën”.
“Shpesh dëgjojmë se jetojmë në një botë të ndarë dhe plot konflikte. Por kjo Kupë Bote ka treguar se ka shumë më tepër gjëra që na bashkojnë sesa na ndajnë. Miliona njerëz u mblodhën në SHBA, Kanada, Meksikë dhe në mbarë botën për të festuar së bashku”, u shpreh Infantino.
Megjithëse turneu nuk pati incidente të mëdha sigurie, ai u shoqërua nga disa polemika politike dhe sportive.
Një prej tyre ishte vendimi i FIFA-s për të anuluar pezullimin me karton të kuq të sulmuesit amerikan Folarin Balogun, pas një kërkese të bërë nga Donald Trump, i cili e përshkroi ndërhyrjen e tij si “vetëm një rekomandim”.
Në mbyllje, Infantino theksoi se pavarësisht se vetëm një kombëtare do të fitojë trofeun, fituesi më i madh ka qenë vetë futbolli.
“Në fund do të dimë nëse kampione do të shpallet Spanja apo Argjentina. Por një gjë e dimë që tani: futbolli nuk është vetëm sporti më popullor në botë, por është bërë gjuha universale që i bashkon të gjithë njerëzit.”
