Izraeli ka ndërmarrë një hap ligjor drejt zbatimit të një propozimi kontrovers të ministrit ekstremist të Sigurisë Kombëtare, Itamar Ben-Gvir, për të rrethuar burgjet ku mbahen rreth 10 mijë palestinezë të arrestuar me hendeqe të mbushura me krokodilë, raportojnë mediat në gjuhën hebraike.
Kanali izraelit Channel 7 raportoi të enjten se ministrja e Mbrojtjes së Mjedisit, Idit Silman, ka nënshkruar një urdhër që i riklasifikon krokodilët si “kafshë të egra të menaxhuara”, duke u mundësuar institucioneve shtetërore, përfshirë Shërbimin e Burgjeve të Izraelit, që t’i mbajnë ato në ambientet e tyre nën kushte të përcaktuara.
Sipas medias, ky vendim heq një pengesë të rëndësishme ligjore që kishte bllokuar më parë planin, pasi krokodilët ishin klasifikuar si kafshë të egra të mbrojtura dhe mund të mbaheshin vetëm në kopshte zoologjike të licencuara.
Channel 13 raportoi se ndryshimi ligjor erdhi pas kundërshtimeve nga Autoriteti Izraelit për Natyrën dhe Parqet ndaj projektit të propozuar, të cilin mediat hebraike e kanë quajtur “burgu i krokodilëve”.
Ben-Gvir e prezantoi propozimin rreth gjashtë muaj më parë, duke kërkuar ndërtimin e një burgu të sigurisë së lartë të rrethuar me kanale ujore të mbushura me krokodilë, me qëllim pengimin e përpjekjeve për arratisje të të burgosurve palestinezë.
Sipas Channel 7, Shërbimi i Burgjeve të Izraelit tashmë ka nisur të shqyrtojë realizueshmërinë e projektit, përfshirë vizita në kopshte zoologjike për të studiuar mënyrën e trajtimit dhe kujdesit ndaj krokodilëve.
Media raportoi se zyrtarët besojnë se hendeqet me krokodilë mund të ulin kostot e ruajtjes dhe njëkohësisht të rrisin sigurinë e burgjeve. Sipas tyre, një krokodil i ri kushton rreth 8 mijë dollarë, ndërsa një krokodil i rritur mund të kushtojë deri në 20 mijë dollarë.
Nuk ka pasur ende ndonjë reagim nga Shërbimi i Burgjeve të Izraelit lidhur me këtë plan të raportuar ose vendin ku ai mund të zbatohet.
Rreth 9.500 palestinezë aktualisht mbahen në burgjet dhe qendrat e ndalimit izraelite, përfshirë gra dhe fëmijë, në kushte për të cilat organizatat palestineze dhe izraelite të të drejtave të njeriut thonë se përfshijnë uri, torturë dhe neglizhencë mjekësore, duke çuar në vdekjen e dhjetëra palestinezëve në rrethana të paqarta.
