Lucas Digne u shndërrua në një nga lojtarët më të kritikuar të Francës pas humbjes në gjysmëfinalen e Kupës së Botës ndaj Spanjës. Përballja me talentin e Barcelonës, Lamine Yamal, rezultoi tepër e vështirë për mbrojtësin francez, i cili u mund disa herë në duel dhe shkaktoi edhe penalltinë që zhbllokoi ndeshjen në favor të spanjollëve.
Situata ndryshoi vetëm pas hyrjes në fushë të Theo Hernandez. Ish-mbrojtësi i Milanit u shfaq më i sigurt në mbrojtje dhe më aktiv në sulm, duke kufizuar më mirë lëvizjet e Yamal. Kjo bëri që zgjedhja fillestare e trajnerit Didier Deschamps për të aktivizuar Digne të vihej edhe më shumë në diskutim.
Megjithatë, dilema për pozicionin e mbrojtësit të majtë nuk është e re në kombëtaren franceze. Gjatë muajve të fundit, Digne dhe Theo Hernandez janë alternuar vazhdimisht në formacion, pa arritur ta bëjnë vendin e tyre të padiskutueshëm.
Edhe gjatë turneut, Deschamps provoi të dy futbollistët. Theo luajti ndaj Senegalit, ndërsa Digne mori minuta kundër Irakut. Më pas ish-lojtari i Milanit u rikthye titullar ndaj Norvegjisë, por shkaktoi një penallti, çka e shtyu stafin teknik të rikthehej sërish te Digne në fazën me eliminim direkt.
Në çerekfinale dhe gjysmëfinale, mbrojtësi i Aston Villas ruajti vendin në formacion, por paraqitja ndaj Spanjës rezultoi zhgënjyese. Dueli me Lamine Yamal u kthye në një makth, ndërsa zëvendësimi i tij me Theo Hernandez nxori edhe më shumë në pah vështirësitë që pati gjatë ndeshjes.
Gazeta franceze L’Equipe e vlerësoi Digne me notën 2, ndërsa media italiane La Gazzetta dello Sport i dha notën 3, duke e cilësuar një nga më të dobëtit në fushë.
Sipas mediave franceze, pozicioni i mbrojtësit të majtë mbetet një nga problemet më të mëdha të “Les Bleus”, ndërsa trajneri i ardhshëm, Zinedine Zidane, pritet të gjejë një zgjidhje më të qëndrueshme për këtë rol.
