Zbulimi me qeliza staminale sjell shpresë të re për trajtimin e verbërisë
Një zbulim i ri shkencor u ka dhënë shpresë personave me probleme të rënda të shikimit, pasi qelizat e rritura në laborator arritën të rikthenin funksionin e retinës te minjtë. Sipas studiuesve amerikanë, kjo mund të hapë rrugën për trajtime të reja kundër verbërisë dhe sëmundjeve të syrit.
Inxhinierët biomjekësorë të Universitetit Duke, në Karolinën e Veriut, përdorën qeliza staminale pluri potente të induktuara (iPSC) për të krijuar për herë të parë qeliza të specializuara të enëve të gjakut të retinës. Këto qeliza janë thelbësore për shëndetin e retinës, pjesës së syrit që zbulon dritën dhe dërgon sinjale në tru.
Kur u injektuan te minjtë me sëmundje të retinës, qelizat u integruan në indin e dëmtuar, rigjeneruan enët e gjakut dhe rikthyen funksionin normal të retinës. Studiuesit arritën gjithashtu të krijonin në laborator inde funksionale të enëve të gjakut të retinës, të cilat mund të përdoren për të studiuar sëmundje të ndryshme të syrit dhe për të testuar trajtime të reja.
Rezultatet, të publikuara në revistën Nature Biomedical Engineering, tregojnë se kjo teknologji mund të ndihmojë në zhvillimin e terapive për humbjen e shikimit.
Drejtuesja e studimit, profesorja Sharon Gerecht, tha se sëmundjet që prekin enët e gjakut të retinës prekin miliona njerëz, por ende nuk kuptohen plotësisht. Ajo shpjegoi se retina është pjesë e sistemit nervor qendror dhe ka një barrierë mbrojtëse që e ruan nga sëmundjet, por njëkohësisht e bën më të vështirë trajtimin.
Studiuesit zbuluan se qelizat e krijuara në laborator ndihmuan në formimin e enëve të forta të gjakut kur u përdorën përpara shfaqjes së humbjes së shikimit, duke sugjeruar se ato mund të përdoren edhe si trajtim parandalues.
Ekipi tani synon të vazhdojë kërkimet dhe të zhvillojë modele njerëzore të retinës për testimin e barnave të reja. Ata kanë paraqitur gjithashtu një kërkesë për patentë që mbulon përdorimin e kësaj teknologjie në trajtime dhe në zhvillimin e ilaçeve. / Daily Mail – Syri.net
