Egli Tako, një nga figurat më të njohura të showbiz-it shqiptar, ndan me ne një rrëfim të thellë dhe emocional në “Grida Duma Podcast”, ku flet për dashurinë, miqësinë dhe përvojat e saj pas pjesëmarrjes në “Big Brother VIP”.
Ajo theksoi se askush nuk mund ta kuptojë vërtet se çfarë ndodh brenda mureve të shtëpisë, përveç atyre që e kanë përjetuar vetë këtë eksperiencë. Egli shprehu se ndjenja e izolimit është e fortë, duke thënë: “Kur hyn aty nuk e di nëse jeta vazhdon jashtë”.
Një nga momentet më të rëndësishme që ajo ndau ishte besnikëria ndaj partnerit të saj. Ajo pranoi se i kishte dhënë besën atij dhe se nuk kishte ndërmend të kthehej pas, pavarësisht gjykimeve që mund të kishte marrë nga publiku.
Gjatë bisedës, Egli shprehu mendimet e saj mbi dashurinë në kohët moderne. Ajo vuri në dukje se sot, shumë njerëz nuk po investojnë kohë në marrëdhënie, duke theksuar se “në marrëdhënie vajzës i lejohet të jetë më e përkëdhelur”.
Ajo e përshkroi marrëdhënien si një dinamikë ku vajza duhet të ndihet si “princesha”, duke sugjeruar se kjo është një qasje që duhet ta pranojë edhe partneri i saj.
Egli gjithashtu diskutoi për materializmin në marrëdhënie, duke kritikuar djemtë që përpiqen të impresionojnë vajzat me luks, në vend të ndjenjave të vërteta dhe lidhjeve të thella.
Ajo ndau gjithashtu vendimin e saj për të ndryshuar pamjen fizike, duke hequr dorë nga trupi shumë muskuloz që kishte ndërtuar në palestër. “Më pëlqen trupi që kam tani, më i hollë dhe femëror”, tha ajo me krenari.
Kur u pyet për jetën e saj sentimentale, Egli pranoi se i mungon një partner, sidomos në fundjavë, por theksoi se nuk do të pranojë një lidhje që nuk e bën të lumtur.
