Halil Snopçe, deputet i ASH-së, deklaroi se Aleanca e Shqiptarëve e mbështet idenë që diaspora të ketë mundësi të votojë në mënyrë elektronike.
Pas debatit për Kodin e ri Zgjedhor dhe mungesës së një qëndrimi të përbashkët mes partive, Snopçe tha se ASH është në favor që mërgata të votojë si elektronikisht, ashtu edhe me postë, por jo përmes tre zonave të veçanta zgjedhore.
Ai theksoi se qëndrimi i tyre është që votuesit nga diaspora të votojnë për qendrat e votimit që lidhen me adresat e tyre në vend. Sipas tij, nuk synohet që të ketë deputetë të veçantë nga diaspora, por që vota e saj të ndikojë te 120 deputetët, në varësi të vendit ku ata jetojnë në vend.
Snopçe shtoi se, nëse regjistrimi i popullsisë lidhet edhe me diasporën, atëherë një qasje e tillë është shumë logjike.
Mes tjerash, ai u shpreh se janë për heqjen e tre zonave zgjedhore, me nga një deputet për diasporën, dhe që votat e mërgatës të ndikojnë drejtpërdrejt te deputetët në Maqedoni.
