Dy raste të etheve të Nilit Perëndimor janë konfirmuar në laboratorët e Klinikës Universitare për Sëmundje Infektive dhe Gjendje Febrile, njoftoi drejtori i klinikës, Fadil Cana. Të dy pacientët janë të shtruar në spital, ndodhen nën mbikëqyrje të vazhdueshme mjekësore dhe po trajtohen sipas rekomandimeve bashkëkohore mjekësore.
“Gjendja e tyre shëndetësore po monitorohet me kujdes”, tha Cana.
Ethet e Nilit Perëndimor janë një sëmundje virale që transmetohet përmes pickimit të mushkonjave të infektuara. Shumica e personave të infektuar nuk shfaqin simptoma ose kanë një formë të lehtë të sëmundjes, ndërsa te një numër i vogël pacientësh, veçanërisht te të moshuarit dhe personat me sistem imunitar të dobësuar, mund të zhvillohen komplikime të rënda neurologjike.
Nga Klinika Universitare për Sëmundje Infektive u bëhet thirrje qytetarëve që të respektojnë masat për mbrojtje nga pickimet e mushkonjave, duke përdorur repelentë, duke veshur rroba me mëngë dhe pantallona të gjata gjatë qëndrimit në ambiente të hapura, duke vendosur rrjeta mbrojtëse në dritare dhe duke eliminuar ujin e ndenjur, ku shumohen mushkonjat.
Aktualisht nuk ka arsye për panik, por kërkohet kujdes i shtuar, sidomos gjatë verës, kur aktiviteti i mushkonjave është më i lartë. Qytetarët që pas pickimit nga mushkonja zhvillojnë temperaturë të lartë, dhimbje të forta koke, ngurtësim të qafës, çrregullime të vetëdijes ose simptoma të tjera neurologjike, duhet të kërkojnë menjëherë ndihmë mjekësore.
Klinika mbetet në koordinim të vazhdueshëm me institucionet kompetente shëndetësore dhe po ndjek me kujdes situatën epidemiologjike. Sipas raporteve të fundit evropiane, këtë sezon janë regjistruar tashmë raste të etheve të Nilit Perëndimor në rajon, gjë që thekson rëndësinë e diagnostikimit në kohë, mbikëqyrjes epidemiologjike dhe masave parandaluese.
