Sot në seancën e rregullt të Qeverisë po shqyrtohet Rebalanci i Buxhetit, një hap kyç për rregullimin e planit financiar të shtetit. Ministrja e Financave, Gordana Dimitrieska-Koçoska, bëri të ditur se ky rebalanc parasheh një korrigjim të deficitit buxhetor në rritje, i cili vjen si rezultat i nevojave për financimin e investimeve kapitale dhe projekteve infrastrukturore.
Fokusi te investimet kapitale Sipas ministres, për herë të parë po ndodh një rritje e deficitit për shkak të përshpejtimit të shpenzimeve kapitale, një veprim që ajo e vlerëson si të justifikuar sipas Ligjit për Buxhetet. “Kemi rritje të shpenzimeve kapitale në pjesën e Ministrisë së Mjedisit Jetësor, projekteve IPA dhe programit të AA-së. Sot do të prezantojmë detajet se cilat institucione do të marrin mjete shtesë për zhvillim,” deklaroi Dimitrieska-Koçoska.
Ajo theksoi se llogaritjet janë komplekse për shkak të efekteve indirekte, por shtoi se mbështetja e qeverisë ndaj qytetarëve dhe ekonomisë ka qenë vendimtare:
“Në periudhën e kaluar kishim çmimet më të ulëta të naftës në rajon. Edhe pse kemi një minus prej 1.5 miliardë denarë nga akciza, ky efekt negativ do të ishte shumë më i madh nëse nuk do të kishim fluksin e madh të qytetarëve të huaj që furnizoheshin me karburant në vendin tonë.”
Ky rebalanc, sipas qeverisë, synon që në mënyrë më efikase t’i alokojë mjetet në sektorët që gjenerojnë rritje ekonomike dhe infrastrukturë moderne për qytetarët.
