Konflikti në Liban mes Izraelit dhe Hezbollahut do të jetë në qendër të bisedimeve mes Iranit dhe Shteteve të Bashkuara, sipas zëdhënësit të Ministrisë së Jashtme iraniane, Esmaeil Baqaei.
Sipas tij, në negociatat e zhvilluara sot pritet të diskutohet situata në Liban, ku Teherani pretendon se Izraeli nuk ka respektuar angazhimet e tij. “Regjimi sionist vazhdon të shkelë angazhimet në Liban, kjo çështje do të jetë tema kryesore e diskutimit”, tha Baqaei, sipas agjencisë shtetërore iraniane të lajmeve IRNA.
Përveç konfliktit në Liban, Irani pritet të kërkojë diskutime edhe për çështje ekonomike, përfshirë lirimin e aseteve të ngrira iraniane dhe mundësinë e licencimit të shitjes së naftës iraniane.
Nga ana e Uashingtonit, qëllimi kryesor i negociatave ka qenë trajtimi i programit bërthamor të Iranit.
Megjithatë, kjo çështje nuk është përmendur në deklaratën e zëdhënësit iranian, duke treguar se palët mund të kenë prioritete të ndryshme në tryezën e bisedimeve.
