Protestuesit anti-imigracion dogjën ndërtesa dhe automjete në Belfast të martën në mbrëmje dhe bllokuan rrugët, një ditë pas një sulmi me thikë nga një refugjat sudanez, i fiksuar në një video që tronditi vendin. Qindra protestues, shumë prej të cilëve të maskuar, u mblodhën në disa pika në të gjithë Belfastin. Një autobus dhe disa makina u dogjën, ndërsa një ndërtesë në periferi të qendrës së qytetit u përfshi nga flakët dhe banorët e saj u detyruan të evakuoheshin. “Deri në orën 7:30 të mbrëmjes ata u vunë flakën kazanëve të mbeturinave, dëgjuam makina policie dhe sirena,” tha një inxhinier me origjinë indiane që jeton në Belfast për pak më shumë se një vit. “Gjithnjë e më shumë njerëz filluan të vinin, filluan të hidhnin bomba molotov. Papritmas zjarri filloi, kishim tym brenda ndërtesës, zjarrfikësit hynë brenda dhe na kërkuan të largoheshim”, tha ai. Shumë banorë të tjerë e përshkruan situatën si të frikshme. Mediat britanike treguan ndërtesa të tjera në flakë. Helikopterë policie patrulluan mbi qytet dhe dyqanet u mbyllën herët. Michelle O’Neill, Kryeministrja e Irlandës së Veriut, i kritikoi protestat dhe bëri thirrje për qetësi.
