Të tronditur nga planet e presidentit Trump për Grenlandën dhe komentet e tij shpesh armiqësore ndaj aleatëve tradicionalë të Amerikës, udhëheqësit europianë u zotuan në Mynih për një rol më të madh në mbrojtjen e përbashkët të NATO-s.
Udhëheqësit kryesorë kanë theksuar se kjo është thelbësore që Europa të përballet me një Rusi armiqësore.
Presidenti francez Emmanuel Macron, ndërsa hyn në vitin e fundit të presidencës, u bëri thirrje homologëve europianë të mendojnë në mënyrë strategjike, duke investuar në programe raketore me rreze të gjatë veprimi. Gjithashtu, ai ofroi ombrellën bërthamore të Francës për vendet europiane, duke garantuar arkitekturën e ardhshme të sigurisë së bllokut.
Duke folur në Konferencën e Sigurisë së Mynihut, presidenti Macron hodhi poshtë akuzat se Europa është në rënie dhe mbrojti përpjekjet e saj për të luftuar dezinformimin dhe mediat sociale që po dëmtojnë demokracitë perëndimore.
“Ky është momenti i duhur për guxim. Ky është momenti i duhur për një Europë të fortë,” tha Macron. “Europa duhet të mësojë të bëhet një fuqi gjeopolitike. Kjo nuk ka qenë pjesë e ADN-së sonë”.
Më vonë këtë muaj, Macron do të mbajë një fjalim mbi parandalimin bërthamor të Francës.
Macron paralajmëroi se Europa do të duhet të “përcaktojë rregullat e saj të bashkëjetesës” me Rusinë, sapo të arrihet një marrëveshje paqeje për t’i dhënë fund luftës në Ukrainë, me qëllim kufizimin e rrezikut të përshkallëzimit.
“Nëse Europa dëshiron të jetë në pozicion force për të diskutuar me Rusinë në të ardhmen, vendet e Kontinentit të Vjetër duhet të zhvillojnë në mënyrë aktive mjetet në fushën e mbrojtjes”, theksoi Macron.
