Protestuesit pro-palestinezë në disa qytete evropiane bllokuan trafikun dhe shkatërruan dyqane dhe restorante të mërkurën, pasi forcat izraelite ndaluan një flotilje që transportonte ndihma humanitare për në Gaza. Izraeli u përball me dënim ndërkombëtar pasi ushtarë të armatosur izraelitë hipën në rreth 40 anije që përpiqeshin të thyenin një bllokadë detare për të dërguar ndihma në enklavën palestineze, duke arrestuar më shumë se 400 aktivistë të huaj, përfshirë aktivisten suedeze për klimën Greta Thunberg.
Në Barcelonë, protestuesit thyen ose shkruan slogane anti-Izrael në dritaret e dyqaneve dhe restoranteve, duke përfshirë zinxhirin e kafesë Starbucks, zinxhirin e hamburgerëve Burger King dhe zinxhirin e supermarketeve Carrefour, duke i akuzuar ata për bashkëpunim në ofensivën e Izraelit në Rripin e Gazës.
“Këto protesta janë e vetmja gjë që mund të bëjmë”, tha Akram Azahomaras, i cili ishte midis marshuesve, por tha se shkatërrimi i dyqaneve ishte kundërproduktiv. “Ne duhet ta bëjmë në mënyrë paqësore, me fjalët tona, jo me veprimet tona.”
Në Itali, studentët pushtuan universitetet, përfshirë Universitetin Shtetëror të Milanos dhe Universitetin Sapienza të Romës, dhe bllokuan hyrjen në universitetin në Bolonja duke përdorur goma. Në Torino, qindra njerëz bllokuan trafikun në rrugën unazore të qytetit, sipas raportimeve të agjencive të lajmeve. Mjekë, infermierë, farmacistë dhe të tjerë ndezën fenerë dhe dritat e baterive edhe të celularëve dhe lexuan emrat e 1,677 punonjësve të shëndetësisë të vrarë në Gaza, thanë organizatorët.
Sindikatat italiane kanë bërë thirrje për një grevë të përgjithshme në mbështetje të flotiljes së ndihmës për Gazën, dhe priten më shumë se 100 marshime ose tubime në të gjithë vendin.
Ministri italian i Mbrojtjes, Guido Crosetto, kritikoi bllokadën e shkaktuar nga disa prej protestuesve.
“A beson vërtet dikush se bllokimi i një stacioni, një aeroporti, një autostrade ose shkatërrimi i një dyqani në Itali do t’i sjellë lehtësim popullit palestinez?” shkroi ai në X.
Në të gjithë Evropën, mijëra protestues dolën në rrugë në Dublin, Paris, Berlin dhe Gjenevë për të dënuar ndërprerjen e flotiljes nga Izraeli. Tubime u mbajtën gjithashtu në Buenos Aires, Mexico City dhe Karaçi.
Në Stamboll, një turmë u mblodh jashtë ambasadës izraelite duke mbajtur pankarta me slogane të tilla si “Izraeli po masakron njerëzimin, jo Gazën / Mos heshtni, ngrihuni”.
Lufta gjenocidale e Izraelit në Gaza ka vrarë më shumë se 66,000 njerëz.
Izraeli nisi ofensivën e tij pas një sulmi të udhëhequr nga Hamasi ndaj Izraelit më 7 tetor 2023, në të cilin rreth 1,200 njerëz u vranë dhe 251 u morën peng në Gaza, sipas llogaritjeve izraelite. Megjithatë edhe përpara sulmit të Hamasit, banorët e Gazës përjetonin tortura të përditshme nga autoritetet izraelite.
