Trajneri i Arsenalit, Mikel Arteta ka dhënë një intervistë për “Mundo Deportivo”, ku është ndalur te roli i tij si trajner dhe në kohën kur ishte lojtar. Ai gjithashtu foli edhe për Guardiolën dhe Çabi Alonson.
A ju mungon koha juaj si futbollist?
Jam shumë afër lojtarëve çdo ditë! Gjithmonë më pyesin nëse është më mirë të jesh lojtar apo trajner, dhe unë gjithmonë përgjigjem se nuk ka asgjë si të jesh lojtar, por ka raste në një karrierë trajneri kur ndihesh sikur ke ekipin pas teje, të gjithë ekipin të lidhur, njerëzit, një klub me vizion, dhe merr rezultate… nuk ka asgjë të tillë.
Cili është lojtari ideal i Artetës?
Ai që merr vendime në fushë pa i thënë asgjë dhe ai që është vazhdimisht i aftë të performojë në nivelin që prisni çdo ditë.
A është rastësi që ka kaq shumë trajnerë bask në nivelin më të lartë në Angli? Në Premier Ligë, je ti, Emeri, Iraola…
Nuk e dimë. Do të duhet të shohim në vitet në vijim nëse do të dalin më shumë, por është e vërtetë që jetojmë dhe jemi rritur në një kulturë ku ka një pasion të jashtëzakonshëm për futbollin. Ka shumë ndërgjegjësim dhe njerëzit i kushtojnë shumë orë futbollit. Pastaj mendoj se ka vlera të caktuara që përfaqësojnë të gjithë baskët dhe mendoj se ata përshtaten shumë mirë në rolin e trajnerit.
Pse mendoni se ka kaq shumë lojtarë spanjollë në Premier Ligë dhe kaq pak lojtarë anglezë në La Liga?
Epo, kjo është një pyetje shumë e mirë… Mendoj se ka shumë të bëjë me aftësinë për t’u përshtatur. Dhe pastaj sepse anglezët, në fund të fundit, ndoshta kanë pasur mjedisin më të mirë këtu, ligën më të mirë për shumë vite dhe nuk kanë pasur kurrë nevojë të kërkojnë liga të tjera. As për arsye sportive dhe as për arsye ekonomike.
I njeh shumë mirë Çabi Alonson dhe Pep Guardiolën, a identifikohesh me ndonjërin prej stileve të tyre?
Unë identifikohem me shumë gjëra. Së pari, sepse kemi luajtur në të njëjtin pozicion, por edhe sepse i njoh të dy shumë mirë. Kam luajtur me Çabin dhe e njoh Pepin që kur isha 15 vjeç, kam punuar me të për katër vjet. Identifikohem me mënyrën e tij të të luajturit, me idenë e tij për lojën, me vizionin e tij, me mënyrën e tij të sjelljes… Me gjithçka.
Por me cilin nga të dy keni më shumë të përbashkëta?
Nuk më pëlqen të krahasoj, janë dy ide mjaft të ngjashme të zbatuara në mënyra shumë të ndryshme. Unë kam timen.
