Mbrëmja e sotme pritet të jetë një natë historike për futbollin evropian, teksa Chelsea dhe Paris Saint-Germain do të përballen në finalen e Kupës së Botës për Klube, një duel që premton spektakël, emocione dhe një trofe që të dy klubet e dëshirojnë me ngulm.
Chelsea, i drejtuar nga Enzo Maresca, ka befasuar kritikët këtë sezon duke fituar Ligën e Konferencës dhe duke siguruar një vend mes më të mirëve në botë.
Në gjysmëfinale, londinezët mposhtën Fluminensen 2:0, falë një dygolëshi vendimtar të João Pedro, shkruan Gazeta Express.
Në anën tjetër, PSG nuk ka nevojë për shumë prezantim. Pasi siguroi Ligën e Kampionëve, kampionët francezë e kanë shndërruar këtë turne në një mision për të kompletuar një sezon perfekt.
Parizienët treguan forcën e tyre duke mposhtur Bayern München dhe më pas Real Madridin me një rezultat bindës 4:0 në gjysmëfinale. Me Dembélé, Mendes dhe Fabián Ruiz në superformë, skuadra e Luis Enrique vjen si favorite për të ngritur trofeun.
Finalja zhvillohet sonte në orën 21:00 me orën tonë lokale dhe pritet të ndiqet nga miliona tifozë anembanë globit.
