Bayern Munich vendosi të paguante klauzolën prej 60 mln eurosh të Crystal Palace për Michale Olise. 22-vjeçari firmosi një kontratë 5-vjeçare me bavarezët dhe është entuziast për nisjen e kësaj aventure fantastike.
“Bisedimet ishin shumë pozitive dhe jam shumë i lumtur që do të luaj për një klub kaq të madh sa Bayerni. Sfidë e madhe për mua, por pikërisht këtë kërkoja.
Dua të dëshmoj veten në nivele të larta dhe të luaj rolin tim për të siguruar fitimin e sa më shumë titujve me ekipin në vitet e ardhshme”, u shpreh lojtari më i ri i skuadrës së Vincent Kompany.
10 gola dhe 6 asistime regjistroi në sezonin e fundit në Premier League francezi, i cili aktivizohet si sulmues i djathtë dhe mesfushor i avancuar.
“Michael është super i talentuar. E njoh mirë, pasi kemi luajtur bashkë te moshat e Chelseat. Dhe ishte shumë bukur.
Ai ka një talent të madh dhe aftësi të jashtëzakonshme. Ka shënuar shumë gola me Palacen, kështu që jam shumë i gëzuar që u bë pjesë e Bayernit”, u shpreh Musiala.
