Partitë opozitare shqiptare, e sidomos Lëvizja Besa, po e e humbin integritetin e tyre ashtu si dhe vlerat dhe principet e tyre për shkak të bashkëpunimi me VMRO-në, e cila është kundër votimit të ndryshimeve kushtetuese.
Semir Pajaziti, një nga aktivistët e Partisë Demokratike Evropiane(PDE), ka deklaruar se opozita shqiptare është nën ndikimin e VMRO-DPMNE-së dhe se nuk ka asnjë qëllim dhe vizion për të ardhmen e vendit. Ndërkaq ish-deputeti, Ismet Ramadani, ka vënë në dukje se partitë politike shqiptare duhet të jenë të kujdesshme dhe të votojnë për ndryshimet kushtetuese, në mënyrë që të mos ndërtohet një aleancë e partive politike antiperëndimore dhe antishqiptare.
Semir Pajaziti theksoi se shkak i largimit të tyre nga Lëvizja Besa ka qenë pikërisht veprimi pro VMRO-DPMNE-së, dhe bashkëpunimi i vazhdueshëm i Mickovskit me opozitën shqiptare, duke u bazuar në sjelljen e tyre si në Kuvend ashtu edhe jashtë tij. Sipas tij kjo ka bërë që opozita të ketë agjendë të njëjtë me VMRO-DPMNE-në.
Pajaziti ka kritikuar opozitën shqiptare se është kundër integrimit evropian të Maqedonisë, duke mos kontribuar për hapjen e rrugës dhe zhbllokimin e eurointegrimeve. Ai ka thënë se kjo situatë gjeneron një disponim antieuropian, që po pengon progresin e vendit.
“Në të gjitha prononcimet tona kemi theksuar se mënyra se si opozita shqiptare sillet ndaj VMRO-DPMNE, është qasje vasale. Dëshmitë tona se blloku opozitar s’ka kauzë dhe vizion për të ardhmen e vendit dëshmohet me atë që ata vetëm presin mëshirën nga ndonjë fitore eventuale të VMRO-DPMNE-së. Në këtë drejtim jemi të bindur se çdo bashkëpunim me VMRO-DPMNE-në është vetëm në shërbim të politikave ditore të tyre dhe aspak në shërbim të shqiptarëve apo të ardhmes më të mirë të qytetarëve të vendit”, tha Pajaziti.
