Sulmuesi i Inter Miamit, Lionel Messi, ka rrëfyer se ai kurrë nuk ka dashur të bashkohej me PSG dhe të largohej nga Barcelona në vitin 2021. Atij, gjithashtu nuk i intereson nëse do ta fitojë edicionin e ardhshëm të “Topit të Artë”, sepse ka arritur gjithçka ka ëndërruar në karrierë. Të gjitha këto deklarata të forta, ylli argjentinas i bëri gjatë një konference për shtyp, të mbajtur të enjten pasdite.
Messi hodhi poshtë kthimin në Katalonjë në qershor, kur vendosi të kalonte Atlantikun për një sfidë të re në MLS. Ai ka pasur një fillim mbresëlënës në Florida, duke shënuar 9 gola në 6 ndeshje dhe udhëhequr ekipin e ri drejt finales së Kupës së Ligës, që do të luhet kundër Nashville të shtunën mbrëma.
36-vjeçari dhe familja e tij po shijojnë qartë jetën e tyre të re në Florida, gjë të cilën Messi e rrëfeu në paraqitjen e tij të parë zyrtare para mediave që nga kalimi te klubi në pronësi të David Beckham dhe Jorge Mas.
“Ne jemi ende në përfundim të rregullimit të gjërave, kemi mbërritur në Miami një muaj e gjysmë më parë, – shpjegoi Messi. – Ende nuk e kemi gati shtëpinë në të cilën do të jetojmë, por ishte shumë e lehtë të zgjidhnim Miami. Ne ishim të bindur që të vinim në këtë vend dhe njerëzit na e bënë shumë të lehtë me mikpritjen. Klubi, tifozët dhe njerëzit që takojmë në rrugë janë shumë dashamirës me ne.
Qyteti është spektakolar dhe ju bën të mundur që ta jetoni ditën në heshtje dhe shumë lehtë. Fëmijët fillojnë shkollën së shpejti. Ndërsa ka mbetur edhe pak për t’u sistemuar, ky proces ishte më i lehtë nga sa mendonim. Ishte e ndërlikuar lëvizja nga Barcelona në Paris, por jo kjo e fundit drejt Miami.
Jam i lumtur, po e shijoj këtë fazë të re dhe përvojën e të jetuarit në këtë vend, që është diçka që më ka shkuar gjithmonë në mendje. Jemi në vendin ku duam të jemi”, – rrëfeu Messi, përpara se “t’i fuste thikën” ish-klubit, PSG, të cilin e la si lojtar të lirë në fund të qershorit.
“Të shkoja në Paris nuk ishte as e planifikuar dhe as e dëshiruar. Nuk doja të largohesha nga Barcelona, por situata u bë e vështirë. Por është e kundërta e asaj që po më ndodh tani, falë Zotit”, – shtoi numri 10.
Fakti që Messi nuk dëshironte të largohej nga klubi i tij i djalërisë prej më shumë se 20 vitesh, u bë e qartë në një konferencë për shtyp lamtumire me lot në sy, në “Camp Nou”, verën e vitit 2021.
Megjithëse Messi kishte synuar të zgjaste kontratën e tij, të cilën presidenti Joan Laporta premtoi se do ta bënte në gjurmët elektorale atë pranverë, katalanasit në fund nuk arritën të sigurojnë lojtarin e tyre më të mirë ndonjëherë për shkak të problemeve me “Fair Play Financiar”. Kjo hapi rrugën që ai t’i bashkohej falas PSG.
Po për shkaqe financiare nuk u bë i mundur kthimi i tij te Barcelona në qershor 2023. Messi tha kur zbuloi lëvizjen e tij tek Inter Miami se nuk donte të priste që Blaugranët të rregullonin shtëpinë e tyre, pasi nuk arritën ta bënin herën e fundit.
Sa i përket çmimit vjetor të “France Football”, që i jepet lojtarit të konsideruar si futbollisti më i mirë në planet, shtatë herë fituesi i çmimit tregoi se nuk mund të kujdesej shumë për ta rimarrë atë nga ish-rivali i Real Madridit, Karim Benzema:
“E kam thënë shumë herë gjatë karrierës sime, ‘Topi i Artë’ është një nga çmimet më të bukura në nivel individual. Por, kurrë nuk i kam dhënë rëndësi, sepse për mua trofetë më të rëndësishëm janë ato ekiporë, në nivel grupi. Isha me fat që arrita gjithçka kisha ëndërruar në karrierë. Pas fitimit të Kupës së Botës, nuk mendoj për atë çmim”.
