Gadi Eisenkot, lideri i partisë centriste izraelite Yashar, do të marrë mandatin për formimin e qeverisë së re, pasi zgjedhjet parlamentare të muajit të kaluar nuk prodhuan një fitues të qartë.
Presidenti i Izraelit, Isaac Herzog, ka vendosur që detyrën për krijimin e qeverisë t’ia besojë Eisenkotit, njoftoi zyra e presidentit të shtunën në mbrëmje.
Vendimi u mor pas konsultimeve që Herzog zhvilloi gjatë ditëve të fundit me përfaqësues të forcave politike, përfshirë vetë Eisenkotin dhe rivalin e tij kryesor, kryeministrin Benjamin Netanyahu.
Sipas njoftimit zyrtar, partitë që përfaqësojnë gjithsej 67 deputetë të Knessetit, parlamentit izraelit, mbështetën Eisenkotin, ndërsa 46 deputetë shprehën mbështetje për Netanyahun.
Presidenti e ka ftuar liderin e Yasharit në rezidencën presidenciale për ceremoninë e dorëzimit të mandatit, e cila pritet të mbahet të dielën, transmeton Telegrafi.
Sipas procedurave në Izrael, kandidati që merr mandatin ka 28 ditë kohë për të formuar qeverinë. Presidenti mund t’ia zgjasë këtë afat edhe për 14 ditë të tjera, nëse është e nevojshme.
Në rast se përpjekja e parë dështon, presidenti mund t’ia besojë mandatin një kandidati tjetër, i cili ka maksimumi 28 ditë për të siguruar mbështetjen e nevojshme.
Nëse edhe përpjekja e dytë dështon, Knesseti mund të kërkojë që një kandidat i tretë të marrë mundësinë për formimin e qeverisë, me një afat prej 14 ditësh. Nëse asnjëra prej këtyre përpjekjeve nuk rezulton e suksesshme, vendi shkon në zgjedhje të reja.
Eisenkot, ish-shef i ushtrisë izraelite, është zotuar se do të bëjë “gjithçka” për të formuar qeverinë e re.
Megjithatë, as blloku i tij dhe as ai i Netanyahut nuk arritën të sigurojnë shumicën në parlamentin me 120 vende.
Blloku i Netanyahut fitoi 53 mandate, ndërsa opozita e udhëhequr nga partia Yashar siguroi 48 vende. Partia e djathtë Likud, e drejtuar nga Netanyahu, mbeti forca më e madhe politike me 27 mandate.
Ndërkohë, partitë arabe arritën të sigurojnë gjithsej 19 vende në parlament, një rezultat rekord.
Zhvillimet vijnë pasi Netanyahu bëri thirrje të shtunën për krijimin e një qeverie të unitetit kombëtar, në përpjekje për të kapërcyer ngërçin politik pas zgjedhjeve.
