Një fëmijë ka humbur jetën si pasojë e fruthit në shtetin e Nju Jorkut, në një kohë kur vendi po përballet me një shpërthim të vazhdueshëm të kësaj sëmundjeje infektive. Lajmi u konfirmua të hënën (2 nëntor) nga autoritetet shëndetësore të Nju Jorkut, të cilat bënë të ditur se kjo është vdekja e parë e lidhur me fruthin në këtë shtet në më shumë se 30 vjet.
Sipas një deklarate të përbashkët të Departamentit të Shëndetësisë së Shtetit të Nju Jorkut dhe autoriteteve të Shëndetit Publik të Qarkut Lewis, fëmija ndërroi jetë si pasojë e shpërthimit të vazhdueshëm të fruthit. Autoritetet nuk dhanë detaje të tjera mbi rastin, duke kërkuar respektimin e privatësisë së familjes. Zhvillimi vjen rreth një muaj pasi guvernatorja e Nju Jorkut, Kathy Hochul, shpalli gjendjen e emergjencës për shkak të përhapjes së fruthit në disa zona të shtetit dhe në territoret fqinje.
Sipas të dhënave të autoriteteve shëndetësore, deri më 24 tetor, në Nju Jork janë regjistruar 178 raste me fruth gjatë këtij viti, tetë prej të cilave në qytetin e Nju Jorkut.
Urdhri i emergjencës u jep infermierëve të licencuar të drejtën të kërkojnë marrjen e mostrave dhe kryerjen e testeve për personat që dyshohen se janë infektuar me fruth.
Situata është shqetësuese edhe në nivel kombëtar. Sipas Qendrave për Kontrollin dhe Parandalimin e Sëmundjeve (CDC), më shumë se 4,800 raste të fruthit janë konfirmuar këtë vit në Shtetet e Bashkuara, me infektime të raportuara në pothuajse të gjitha shtetet. Ky është numri më i lartë i rasteve që nga viti 1991. Të paktën 96% e rasteve të regjistruara këtë vit janë identifikuar te persona të pavaksinuar ose te individë për të cilët nuk dihet statusi i vaksinimit.
Cilat janë simptomat e fruthit?
Sipas CDC-së, simptomat e para të fruthit përfshijnë kollë, rrjedhje të hundëve, temperaturë të lartë dhe skuqje e lotim të syve.
Dy deri në tre ditë pas shfaqjes së simptomave mund të formohen njolla të vogla të bardha në pjesën e brendshme të gojës, të njohura si njollat Koplik.
Ndërsa tre deri në pesë ditë pas fillimit të simptomave shfaqet zakonisht skuqja karakteristike në lëkurë. Ajo nis në fytyrë, pranë vijës së flokëve, dhe më pas përhapet në qafë, gjoks, bark, krahë dhe këmbë. Temperatura mund të kalojë edhe 40 gradë Celsius.
Vaksinimi, mbrojtja kryesore kundër fruthit
CDC ka rekomanduar dy doza të vaksinës MMR, e cila mbron kundër fruthit, shytave dhe rubeolës. Doza e parë rekomandohet në moshën 12-15 muajshe, ndërsa e dyta në moshën 4-6 vjeç. Sipas të dhënave të CDC-së, një dozë e vaksinës është 93% efektive në parandalimin e fruthit, ndërsa dy doza ofrojnë mbrojtje deri në 97%. Për foshnjat nga 6 deri në 11 muajsh që jetojnë ose udhëtojnë në zona me rrezik të lartë të shpërthimit, mund të rekomandohet një dozë e hershme e vaksinës. Përhapja e sëmundjes dhe rritja e numrit të infektimeve kanë rikthyer shqetësimin e autoriteteve shëndetësore amerikane për rëndësinë e vaksinimit, veçanërisht te fëmijët.
