Britania ndalon duhanin për një brez të tërë: Të lindurit nga viti 2009 nuk do të mund të blejnë cigare as në moshën 60-vjeçare

Një 18-vjeçar britanik mund të votojë, të drejtojë makinën dhe, kur të mbushë moshën përkatëse, të gëzojë të gjitha të drejtat e një të rrituri. Por nëse ka lindur nga 1 janari 2009 e tutje, nuk do të mund të blejë ligjërisht një paketë cigare. As në moshën 30-vjeçare, as në të 60-at.

Nga 1 janari 2027, Mbretëria e Bashkuar do të zbatojë një nga ligjet më radikale kundër duhanpirjes, duke krijuar një brez që nuk do të ketë kurrë të drejtën ligjore të blejë produkte duhani.

Ligji, i miratuar më 29 prill 2026, nuk vendos thjesht një kufi moshe. Ai e zhvendos këtë kufi çdo vit, duke bërë që ndalimi të ndjekë përgjithmonë të gjithë personat e lindur nga viti 2009 e në vazhdim.

Kjo do të thotë se një person i lindur më 31 dhjetor 2008 do të mund të vazhdojë të blejë cigare, ndërsa dikush i lindur vetëm një ditë më vonë nuk do ta ketë kurrë këtë mundësi.

Ndalimi përfshin cigaret, produktet e tjera të duhanit, produktet bimore për tymosje dhe letrat e cigareve. Përgjegjësia ligjore bie mbi shitësit, të cilët rrezikojnë gjoba dhe ndjekje penale në rast shkeljeje. Vetë pirja e duhanit nuk kriminalizohet.

Departamenti britanik i Shëndetësisë ka nisur edhe një fushatë sensibilizuese me mesazhin se numërimi mbrapsht ka filluar.

Qeveria britanike synon që, me kalimin e viteve, duhani të zhduket gradualisht nga tregu për brezat e rinj, pa ua hequr të drejtën e blerjes atyre që kanë lindur përpara vitit 2009.

Për herë të parë, e drejta për të blerë cigare në Britani nuk do të përcaktohet më nga mosha që arrin një qytetar, por nga data kur ka lindur.