Një incident është regjistruar para zyrave të Partisë Progresive Serbe (SNS) në Lazarevac, ku qytetarët kanë konstatuar një fuoristradë të bardhë të mbushur me shkopinj bejsbolli. Sipas gazetares së N1, e cila ndodhej në terren, ngjarja u shoqërua me përplasje fizike mes qytetarëve dhe një grupi burrash.
Sipas raportimit, automjeti ishte parkuar para zyrave të SNS-së me bagazhin e hapur, ku dukej një numër i madh shkopinjsh bejsbolli. Qytetarët njoftuan policinë, ndërsa në vendngjarje mbërritën edhe ekipet lëvizëse të Listës Studentore.
Situata u tensionua më tej pas mbërritjes së një automjeti tip “Golf”, me targa të Novi Sadit. Sipas gazetares së N1, burrat që ndodheshin në këtë makinë sulmuan qytetarët e mbledhur, të cilët u kundërpërgjigjën, duke shkaktuar përplasje mes dy grupeve.
Gazetarja raportoi gjithashtu se, pasi policia vonoi kryerjen e këqyrjes së vendit të ngjarjes, qytetarët thyen xhamat e automjetit dhe nxorën vetë shkopinjtë e bejsbollit.
Për momentin, situata para zyrave të SNS-së paraqitet e qetë, por qytetarët vijojnë të qëndrojnë të mbledhur dhe kërkojnë përgjegjësi për atë që ndodhi.
Ngjarja është raportuar në një ditë zgjedhjesh në Serbi, ndërsa mediat vendase po ndjekin zhvillimet në qendrat e votimit dhe incidentet e raportuara gjatë procesit zgjedhor.
