Organizatat terroriste ISIS dhe Al-Kaida vazhdojnë të përbëjnë kërcënim të mundshëm për sigurinë e Maqedonisë së Veriut, veçanërisht për shkak të pozitës gjeostrategjike të vendit dhe rrugëve rajonale të tranzitit.
Megjithatë, shërbimet vendore të sigurisë dhe inteligjencës kanë kapacitete për zbulimin dhe parandalimin në kohë të aktiviteteve të mundshme terroriste, vlerësoi profesoresha e kriminalistikës, Marina Malish Sazdovska, gjatë pjesëmarrjes në emisionin “Studio e Natës” në 4TV.
Sipas saj, lufta efektive kundër terrorizmit kërkon veprimtari të vazhdueshme të inteligjencës, mbledhje informacionesh në terren dhe bashkëpunim të ngushtë me partnerët ndërkombëtarë.
Ajo theksoi rëndësinë e anëtarësimit të Maqedonisë së Veriut në NATO, që mundëson shkëmbimin e informacioneve të klasifikuara me shërbimet e vendeve aleate.
Si shembull të bashkëpunimit ndërkombëtar, Sazdovska përmendi operacionin “Celula 3”, duke nënvizuar se qëllimi kryesor është identifikimi i kërcënimeve që në fazën e planifikimit, përpara se të ndodhë ndonjë sulm.
Profesoresha foli edhe për problemin e luftëtarëve të huaj, të cilët kishin shkuar në zonat e konfliktit në Lindjen e Mesme dhe më pas ishin kthyer në vendet e tyre.
Ajo sqaroi se ndryshimet ligjore kanë krijuar bazën për ndjekjen penale të formave të caktuara të pjesëmarrjes në formacione të huaja ushtarake dhe paraushtarake.
“Kërcënimet terroriste nuk njohin kufij shtetërorë”, theksoi Sazdovska, duke shtuar se monitorimi i vazhdueshëm i rreziqeve, shkëmbimi i informacioneve dhe koordinimi ndërinstitucional janë vendimtare për parandalimin e terrorizmit.
