Kryeministri izraelit, Benjamin Netanyahu, ka sulmuar ashpër presidentin francez, Emmanuel Macron, duke e akuzuar udhëheqjen e Francës se nuk ka vepruar në kohë për të frenuar ekstremizmin islamist.
Në një intervistë për rrjetin televiziv në gjuhën frënge i24News, Netanyahu pretendoi se autoritetet franceze kanë dështuar të përballen me kërcënimin e ekstremizmit radikal, duke deklaruar se Franca është “dorëzuar ndaj pushtimit të Islamit ekstremist”.
“Luftoni, mos ndiqni një politikë paqësimi, luftoni ekstremistët”, deklaroi Netanyahu.
Gjatë intervistës, ai iu referua edhe një bisede që pretendon se ka zhvilluar me Macronin pas sulmit të Hamasit ndaj Izraelit më 7 tetor 2023. Sipas tij, në atë kohë e kishte paralajmëruar presidentin francez se kërcënimi nuk do të kufizohej vetëm në Lindjen e Mesme.
“Nëse nuk i eliminojmë këtu, do t’i keni në Paris”, pretendoi Netanyahu se i kishte thënë Macronit, duke shtuar se zhvillimet e fundit në Francë, sipas tij, dëshmojnë se paralajmërimi ishte i drejtë.
Deklaratat e kryeministrit izraelit rikthejnë në vëmendje debatin politik në Evropë mbi imigracionin, sigurinë dhe ekstremizmin islamist.
Megjithatë, lidhja mes trazirave të fundit në Francë dhe grupeve islamiste nuk është vërtetuar me prova. Pretendimet që e paraqesin praninë e komuniteteve imigrante si dëshmi të ndikimit ose kontrollit të ligjit islamik në disa zona evropiane janë kundërshtuar vazhdimisht dhe kanë nxitur akuza për islamofobi.
Përplasja e fundit verbale vjen në një periudhë marrëdhëniesh të tensionuara mes Parisit dhe Tel Avivit, veçanërisht pas vendimit të Francës për të njohur zyrtarisht shtetin palestinez në shtator të vitit 2025.
Ky vendim shkaktoi reagime të forta nga qeveria izraelite. Netanyahu kishte akuzuar më herët Macronin se po “i hedh benzinë zjarrit të antisemitizmit” në Francë.
Me deklaratat e fundit, kryeministri izraelit e ka zhvendosur përplasjen edhe te çështjet e sigurisë së brendshme franceze, duke vënë në shënjestër mënyrën se si qeveria e Macronit po përballet me dhunën dhe ekstremizmin.
