Më 15.10.2026, Njësia për Kriminalitet Financiar pranë Sektorit për Hetime Kriminalistike, në kuadër të Departamentit për Goditjen e Krimit të Organizuar dhe Serioz, ka paraqitur kallëzim penal në Prokurorinë Themelore Publike Shkup kundër nëntë personave fizikë dhe një personi juridik.
Kallëzimi përfshin: I.T. (53), R.B. (61), N.A. (63), J.M. (58), A.S. (43), S.A.M. (64), S.S. (61) dhe L.K. (64), të gjithë të punësuar në Drejtorinë për Punë Hidrometeorologjike në Shkup, për veprën penale „keqpërdorim i pozitës zyrtare dhe autorizimit“ (neni 353, paragrafi 4, në lidhje me paragrafin 1, si dhe nenin 22 të Kodit Penal, që ka të bëjë me bashkëkryerjen).
Gjithashtu, kallëzim penal është paraqitur edhe kundër V.H. (48), menaxher i një personi juridik nga Manastiri, për „keqpërdorim të pozitës zyrtare dhe autorizimit“ (neni 353, paragrafi 3, në lidhje me paragrafin 1 dhe nenin 22 të Kodit Penal), si dhe kundër një personi juridik nga Shkupi për „falsifikim të dokumenteve“ (neni 378, paragrafi 4, në lidhje me paragrafin 1 të Kodit Penal).
Dyshohet se drejtori ka mundësuar përfitim të kundërligjshëm prej mbi 30 milionë denarësh
I.T., në cilësinë e ushtruesit të detyrës së drejtorit të Drejtorisë për Punë Hidrometeorologjike (DPHM), dyshohet se ka keqpërdorur pozitën zyrtare me qëllim që t’u mundësonte personave të tjerë përfitim të kundërligjshëm pasuror.
Sipas kallëzimit, ai ka vepruar në kundërshtim me dispozitat e Kodit të Etikës së Organizatës Botërore Meteorologjike, të cilat i kishte pranuar përmes një marrëveshjeje në vitin 2023.
Edhe pse, sipas policisë, ishte në dijeni se procedurat ishin juridikisht të paplota dhe me mangësi procedurale, ai kishte marrë dy vendime të veçanta për prokurime në periudha të ndryshme, për të njëjtin aktivitet.
Pavarësisht se paraprakisht kishte marrë specifikimin për sasitë e nevojshme të shërbimeve për të gjithë aktivitetin, procedura ishte zhvilluar mbi bazën e një specifikimi të ndryshuar, me sasi për njësi.
Për më tepër, pa pasur paraprakisht procesverbal të hartuar dhe të nënshkruar për hapjen e ofertave dhe raport për procedurën e zhvilluar, ai kishte pranuar propozimin e komisionit për përzgjedhjen e ofertës më të favorshme, bazuar në kriterin e „çmimit më të ulët“.
Sipas kallëzimit, ai duhej të konstatonte se procedura nuk ishte zhvilluar në përputhje me Kodin e Etikës së Organizatës Botërore Meteorologjike, se ofertuesit nuk i plotësonin kushtet dhe se për të gjitha pozicionet e specifikimit teknik nuk ishin ofruar çmime.
Megjithatë, ai kishte marrë vendim për përzgjedhjen e ofertuesit më të favorshëm dhe, në emër të DPHM-së në Shkup, kishte lidhur kontratë për furnizim me shërbime me personin juridik nga Shkupi. Në këtë mënyrë, sipas policisë, kompanisë i ishte mundësuar përfitim i kundërligjshëm pasuror prej 29.244.786 denarësh, ose rreth 475.000 euro.
Gjithashtu, ai kishte marrë një vendim të dytë për përzgjedhjen e ofertuesit më të favorshëm dhe kishte lidhur kontratë me një person juridik nga Manastiri për shtypjen e materialeve promovuese dhe furnizimin me inventar të imët. Sipas kallëzimit, kësaj kompanie i ishte mundësuar përfitim i kundërligjshëm prej 782.050 denarësh, ose rreth 12.715 euro.
Anëtarët e komisionit dyshohet se kanë pranuar oferta që nuk i plotësonin kushtet
R.B., kryetar i komisionit, si dhe N.A. dhe J.M., anëtarë të komisionit për zhvillimin e prokurimit, gjatë vitit 2023 dyshohet se kanë vepruar në kundërshtim me Kodin e Etikës së Organizatës Botërore Meteorologjike dhe me kushtet e kriteret e përcaktuara në dokumentacionin e prokurimit.
Sipas policisë, ata e dinin se oferta e kompanisë nga Shkupi ishte dorëzuar me vonesë dhe nuk i plotësonte kushtet dhe kriteret, ndërsa oferta e kompanisë nga Manastiri ishte teknikisht e parregullt.
Megjithatë, pa përgatitur dhe nënshkruar procesverbalin dhe raportin për procedurën e zhvilluar, përmes një procesverbali formal të mbledhjes së komisionit kishin propozuar përzgjedhjen e ofertës më të favorshme bazuar në çmim, ndonëse nuk ishin ofruar çmime për të gjitha pozicionet e specifikimit teknik.
Dyshohet për verifikim të faturave me të dhëna të pavërteta
A.S., përgjegjëse për hartimin e vendimit të prokurimit, si dhe S.A.M. dhe S.S., të cilët kishin miratuar prokurimin, megjithëse dyshohet se e dinin që vendimi ishte juridikisht i paplotë dhe proceduralisht i parregullt, e kishin hartuar dhe nënshkruar atë.
Gjithashtu, A.S. kishte hartuar një faturë, ndërsa S.A.M. dhe S.S. e kishin kontrolluar, nënshkruar dhe dërguar për realizim, ndonëse ajo nuk kishte dokumente mbështetëse dhe përmbante koeficientë të sajuar.
Sipas policisë, në këtë mënyrë ata kishin verifikuar me vetëdije të dhëna financiare të pavërteta dhe kishin mundësuar një pagesë të pabazuar.
L.K., kontrollore në Sektorin e Financave, dyshohet se gjithashtu kishte kontrolluar, nënshkruar dhe dërguar për realizim një faturë që nuk kishte dokumente mbështetëse, përmbante koeficientë të sajuar dhe nuk përputhej me ofertën e specifikimit teknik.
Sipas kallëzimit, ajo kishte lënë pa kryer kontrollin e detyrueshëm financiar paraprak dhe thelbësor të dokumentacionit, duke mundësuar kështu realizimin dhe likuidimin e faturës dhe një pagesë të pabazuar.
Kompania nga Manastiri dyshohet se ka dorëzuar ofertë të parregullt
V.H., menaxher dhe person përgjegjës i kompanisë nga Manastiri, në emër dhe për llogari të saj, dyshohet se kishte dorëzuar një ofertë që që në fillim ishte formalisht dhe teknikisht e parregullt, në kundërshtim me kushtet e detyrueshme të dokumentacionit të prokurimit.
Sipas policisë, kjo ishte bërë me qëllim që të krijohej hapësirë për manipulime të mëvonshme me përmbajtjen e ofertës, duke e bërë atë të humbiste legjitimitetin si dokument zyrtar dhe juridikisht detyrues.
Ndërkaq, S.S., tashmë i ndjerë, i cili gjatë periudhës përkatëse ishte menaxher dhe person përgjegjës i kompanisë nga Shkupi, dyshohet se i kishte dorëzuar DPHM-së fatura me përmbajtje të pavërtetë, të cilat nuk përputheshin me çmimet e ofruara në specifikimin teknik dhe me vëllimin e shërbimeve të kryera.
Sipas policisë, me këto veprime, I.T., R.B., N.A., J.M., A.S., S.A.M., S.S. dhe L.K. kanë vepruar në kundërshtim me Kodin e Etikës së Organizatës Botërore Meteorologjike dhe kanë mundësuar përfitim të kundërligjshëm pasuror prej 29.244.786 denarësh (475.000 euro) për kompaninë nga Shkupi, si dhe 782.050 denarësh (12.715 euro) për kompaninë nga Manastiri.
