Der Klassiker i radhës pritet të dhurojë emocione të mëdha, pasi Bayern Munich dhe Borussia Dortmund përballen në ‘Allianz Arena’ (18:30) në një duel mes dy skuadrave që nuk kanë pësuar ende humbje në këtë sezon të Bundesligës. Të dyja ekipet kanë regjistruar nga pesë fitore dhe dy barazime në shtatë javët e para të kampionatit.
Bayern vjen në këtë përballje pas fitores 3-1 ndaj Freiburgut, rezultat që konfirmoi edhe një herë formën e shkëlqyer të bavarezëve. Skuadra e drejtuar nga Vincent Kompany ka realizuar 25 gola në kampionat, duke qenë sulmi më produktiv i Bundesligës. Edhe më mbresëlënës është bilanci në shtëpi, ku ka shënuar 18 gola në vetëm tri ndeshje.
Një nga protagonistët kryesorë është Harry Kane, fituesi më i fundit i Topit të Artë dhe lojtari i parë nga Bundesliga që fiton këtë çmim që prej vitit 1996. Sulmuesi anglez ka shënuar ose asistuar në pesë nga golat e fundit të Bayernit dhe do të kërkojë të vazhdojë serinë pozitive edhe ndaj rivalëve të Dortmundit. Në përballjet kundër verdhezinjve, Kane ka realizuar gjithsej 10 gola në 11 ndeshje me skuadrat ku ka luajtur.
Nga ana tjetër, Borussia Dortmund synon të ndërpresë dominimin e rivalit dhe të konfirmojë ambiciet për titullin kampion, të cilin nuk e fiton që prej sezonit 2011-2012. Forca kryesore e skuadrës këtë sezon ka qenë mbrojtja, pasi ka pësuar vetëm katër gola në shtatë javë, më pak se çdo ekip tjetër në kampionat. Gjithashtu, Dortmundi vjen pas dy ndeshjeve radhazi pa pësuar gol dhe synon të regjistrojë tri ndeshje me portën e paprekur.
Edhe në transfertë, verdhezinjtë kanë treguar rezultate të mira gjatë muajve të fundit, me 11 fitore në Bundesligë jashtë fushës që nga fillimi i sezonit të kaluar, një bilanc që vetëm Bayerni e ka përmirësuar.
Megjithatë, historia e përballjeve direkte favorizon bavarezët. Bayerni ka humbur vetëm një nga 17 ndeshjet e fundit zyrtare kundër Dortmundit, duke regjistruar 13 fitore dhe tri barazime.
Sa u përket mungesave, Bayerni nuk do të ketë në dispozicion sulmuesin Luis Diaz, si dhe disa lojtarë të tjerë të ekipit të parë. Dortmundi do të jetë pa Ramy Bensebaini dhe Konstantinos Karetsas.
Një tjetër emër për t’u ndjekur te miqtë është Maximilian Beier, i cili gjatë vitit 2026 ka kontribuar në 13 gola në Bundesligë, me shtatë realizime dhe gjashtë asistime. ‘Der Klassiker’ premton një përballje të fortë mes sulmit më produktiv dhe mbrojtjes më të mirë të kampionatit.
