Prania e garancisë dhe profesionalizmit maksimal do të jetë në nivelin më të lartë në stadiumin “Air Albania”.
UEFA ka vendosur t’u besojë një trupe elitare arbitrash nga Anglia për të gjykuar përballjen e rëndësishme mes Shqipërisë dhe Bjellorusisë, e vlefshme për rundin e parë të grupit 1 në Ligën C të UEFA Nations League.
Përzgjedhja e arbitrave nga Premier League dëshmon rëndësinë e veçantë që UEFA i ka kushtuar këtij takimi. Bilbili kryesor i sfidës do t’i besohet gjyqtarit të njohur Sam Barrott, i cili do të ndihmohet në anësore nga dy asistentët e tij me përvojë, Adam Nunn dhe Wade Smith.
Roli i arbitrit të katërt i është besuar Farai Hallam, ndërsa siguria te teknologjia do të jetë 100% angleze: Matthew Donohue do të udhëheqë dhomën e VAR-it, i mbështetur nga Paul Howard në rolin e aVAR.
Kjo prani elitare e gjyqtarëve sjell garanci për një lojë të drejtë, me ritëm të lartë dhe pa kontestime. Ndeshja e kësaj të shtune në orën 20:45 do të shënojë gjithashtu nisjen zyrtare të epokës së re të Kombëtares nën drejtimin e trajnerit Rolando Maran. Mbështetja e tifozëve në shkallët e stadiumit dhe arbitrimi me standarde europiane pritet të krijojnë atmosferën e duhur për një mbrëmje të madhe futbolli!
