OnlyFans zhvilloi të shtunën shfaqjen e parë në Javën e Modës në Londër, duke prezantuar një koleksion kapsulë me 18 pjesë, të krijuar në bashkëpunim me stilisten e pavarur Natasha Zinko.
Koleksioni ndërthur stilin karakteristik të Zinkos me identitetin vizual të platformës, përmes motiveve grafike të rrezeve X, siluetave të ngushta dhe veshjeve të përditshme. Të gjitha pjesët janë në masat nga XXS deri në XL, me përjashtim të një kapeleje që vjen në një masë të vetme.
“Ky koleksion kapsulë i kufizuar na u duk një bashkëpunim i natyrshëm që në fillim”, tha Zinko në një deklaratë për Fashion United. “Ne ndajmë të njëjtat vlera: dashurinë, lirinë e identitetit, përfshirjen dhe pozitivitetin ndaj trupit. Qëllimi është vlerësimi i njerëzve pikërisht siç janë.”
Modelet që morën pjesë në shfaqje u përzgjodhën nga krijuesit e përmbajtjes së platformës, si dhe nga bota e argëtimit. Aktorja fituese e çmimit Emmy, Drea de Matteo, e njohur për rolin e Adriana La Cervës në serialin e HBO-së “The Sopranos” dhe tashmë vetë krijuese në OnlyFans, parakaloi me veshje nga koleksioni. Në pasarelë u shfaqën edhe KellyOsbourne dhe KatiePrice, e cila u rikthye në Javën e Modës në Londër për herë të parë pas më shumë se një dekade, pas fushatës së saj me Diesel. Në shfaqje mori pjesë edhe aktorja e “Skins” dhe krijuesja në OnlyFans, Megan Prescott.
Në rreshtin e parë u ulën krijues, mes tyre aktori televiziv James Sutton, si dhe krijuesit e përmbajtjeve për të rritur TaylorRyan dhe prezantuesja e OFTV Reel Rivals, IslaMoon. Në publik kishte gjithashtu emra nga muzika, moda dhe industria e argëtimit.
“Ky bashkëpunim bashkon dy marka që ndajnë besimin te individualiteti, krijimtaria dhe shprehja e guximshme e vetvetes”, tha KeilyBlair, drejtuese ekzekutive e OnlyFans. “OnlyFans ka qenë gjithmonë një platformë ku njerëzit mund ta përcaktojnë veten sipas kushteve të tyre, dhe Natasha Zinko sjell të njëjtin shpirt në modë. Debutimi ynë në Javën e Modës në Londër, ku marrin pjesë krijuesit e OnlyFans, është një festë e komuniteteve që qëndrojnë pas të dyja markave dhe e vetëbesimit për t’u shprehur pa komplekse.”
Zinko po i bashkohet gjithashtu platformës si krijuese, duke u dhënë abonentëve akses në studion e saj dhe në materiale nga prapaskenat e procesit të saj të dizajnit. Koleksioni do të dalë në shitje globalisht nga e hëna, përmes partnerëve ndërkombëtarë të shitjes me pakicë të stilistes, faqes së saj të internetit dhe OnlyFans Store.
Londra zgjeron strategjinë e modës që platforma ka ndërtuar gjatë javëve kryesore të modës në botë. Më parë, ajo ka bashkëpunuar me LGN Louis Gabriel Nouchi në Paris, si dhe me Elena Velez dhe Collina Strada në Nju Jork.
